Tuńǵysh Prezıdent – Elbasy Nursultan Nazarbaev «Eldiktiń jeti tuǵyry» atty qaǵıdattar jıyntyǵy – tarıhpen tamyrlas, búgingi ómir talabymen úndesip otyr. Qoǵamnyń árbir salasyna mán berip, jańa zamandaǵy Qazaqstannyń aldynda turǵan syn-qaterlerin aıqyndaǵan mańyzdy saıası-saraptamalyq qaǵıdattyń bárimizge de qatysy bar.
Birinshi tuǵyr ol – táýelsizdik. Kez kelgen azamat úshin eń qasterli qundylyq. El eńsesin tiktegen egemendiktiń biz úshin mańyzy erekshe. Elbasy bul qasterli túsinikti táýelsizdik alǵan jyldardan beri sanamyzǵa sińirýde. О́skeleń urpaq úshin táýelsizdik tarıhı qundylyq, el erteńine degen senim, alǵa josparlaǵan bolashaǵyna baǵyt beretin eń mańyzdy másele bolýyna kúsh jumsaýymyz kerek. Ol úshin el bolyp birigip, eńbek etý mańyzdy dep oı salady Elbasy. Ekinshisi – birlik pen kelisim – eldigimizdiń myzǵymas tuǵyry. Kópetnosty Qazaqstan halqy úshin bul tuǵyr etnosaralyq, konfessııaaralyq tatýlyqty saqtap qalý máselesi syndy mańyzdy bolmaq. Elbasy egemendik alǵan jyldardan beri Qazaqstan halqy Assambleıasynyń mańyzdylyǵyn eskertip, halyqtar dostyǵynyń myzǵymas sımvoly retinde jyl saıyn elimizde túrli halyqaralyq sharalardy uıymdastyrýdy nazardan tys qaldyrmaıdy. Bul úrdis aldaǵy ýaqytta da jalǵasyn tappaq. Úshinshi tuǵyr – jer – ata-baba murasy, halyq qazynasy. Jer máselesi qazaq halqyna bolmysynan berilgen, qanymen sińip, boıyna bitken erekshe mańyzdy másele. Jeri men eli úshin ómirin qıyp, ǵumyryn arnaǵan ata-babalarymyzdyń amanatyn arqalap, óskeleń urpaqqa osy ulan-ǵaıyr atyrabymyzdy mıras etý bizdiń ortaq mindetimiz ekenin taǵy bir márte eske túsiredi. Tórtinshi tuǵyr – otbasy men salt-dástúr – qoǵamnyń altyn dińgegi. Elbasy: «Otbasy – urpaq tárbıesiniń ustahanasy, qoǵamdyq qatynastardyń bastaýy sanalatyn biregeı ınstıtýt» dep búgingi qoǵamda januıanyń mańyzdylyǵy men rólin taǵy bir márte ereksheleıdi. Adam sanasy azǵyndaǵan jańa zamanda jas otbasylar arasynda beleń alǵan keleńsiz jaǵdaılar, ajyrasý, bir jynysty neke, tolyq emes otbasylar, jetim balalardyń kóbeıýi máseleleri dál osy otbasy ınstıtýtyna elimizde jetkilikti deńgeıde kóńil bólinbeıtindiginiń kórsetkishi. Bul másele el kóleminde nazarǵa alynyp, sheshilýine yqpal etý úshin Elbasy ózi bastap otbasynyń mańyzdylyǵyn aıqyndap berip otyr. Bul – ıgiliktiń nyshany. Besinshi tuǵyr – ulttyq mádenıet – halyqtyń rýhanı tiregi. Búgingi kúni jahandyq básekege qabiletti bolý úshin biregeı ulttyq minez, asqaq rýh kerek deıdi Nursultan Ábishuly. Shynymen-aq, eldiktiń tutqasy – ulttyq mura, til men mádenıet, salt-dástúr men ádebıet. Ult mádenıetin qajetti deńgeıde damytpaıynsha, rýhanı qundylyqtarymyzdyń mártebesi eshqashan bıiktemeıdi. Elbasy nazar aýdarǵan Ulttyq mádenıet salasyn damytý arqyly ǵana biz basqa halyqtardy óner qudiretimen, ǵylymı izdenispen moıyndata alamyz. Altynshy tuǵyr – bilim men eńbek – baqýatty ómirdiń kilti. Tabystyń kilti úzdiksiz bilim alý men tynymsyz eńbek etýde deıdi Nursultan Ábishuly. Básekege qabiletti urpaq tárbıeleý jolynda bilim men ǵylymdy damytýdyń memleket úshin mańyzy mol. Jetinshisi – pragmatızm – básekege qabiletti bolýdyń kepili. Pragmatızm prınsıpteri barynsha qanaǵatshyl, únemshil, ustamdy bolyp, ýaqytty oryndy paıdalanýǵa talpynýdy kózdeıdi. Elbasy bul prınsıpter jastardy tózimdilikke tárbıelep, jańa zaman talabyna saı damýyna múmkindik beretin qabilet dep sanaıtynyn aıtady.
Jalpy, Nursultan Ábishuly «Eldiktiń jeti tuǵyry» atty jańa qaǵıdasymen barsha qazaqstandyqtardyń rýhyn qaırap, eńsemizdi tiktep, budan da bıik asýlarǵa jetý úshin jáne táýelsiz Qazaqstannyń jarqyn bolashaǵy jolynda tynbaı jumys isteýge shaqyrdy.
Gúlnar TOILYBAEVA,
Nur Otan partııasy Almaty oblystyq fılıaly tóraǵasynyń birinshi
orynbasary, depýtattyq fraksııa jetekshisi