QR Saýda jáne ıntegrasııa mınıstri Baqyt Sultanov qazaqstandyq saýda-ekonomıkalyq mıssııanyń Aýǵanstanǵa barǵan delegasııasyn basqardy, dep habarlaıdy Egemen.kz.
Qazaqstannan barǵan bir top delegasııanyń quramynda saýda jáne ıntegrasııa mınıstrligi qyzmetkerleri, eksportty ilgeriletý jónindegi operatorlar, QazTrade kompanııasy jáne birqatar otandyq eksporttaýshy kompanııanyń ókilderi bar.
Sapar barysynda mınıstr Aýǵanstannyń premer-mınıstriniń orynbasary Abdýlla Salam Hanafımen, syrtqy ister mınıstri Amır Han Mýttakı, sondaı-aq atalǵan eldiń saýda jáne ónerkásip mınıstri M.A. Nýrıddın Azızımen kelissózder ótkizdi.
Baqyt Sultanov óz kezeginde aýǵan ákimshiliginiń ókilderine Qazaqstan BUU-nyń Aýǵanstandaǵy gýmanıtarlyq daǵdarysty eńserý jónindegi kúsh-jigerine tolyq qoldaý kórsetip, belsendi qatysyp otyrǵanyn jetkizdi.
Dúnıejúzilik azyq-túlik baǵdarlamasy 20 myń tonna qazaqstandyq undy satyp aldy. «Bizdiń elimiz, kóptegen halyqaralyq áriptester sııaqty, aýǵanaralyq qaqtyǵystyń belsendi kezeńi aıaqtaldy jáne eldi janjaldan keıingi kezeńde qalpyna keltirý ýaqyty keldi dep úmittenemiz», dedi B. Sultanov.