Kezinde otandasymyz Gennadıı Golovkınnen tehnıkalyq nokaýtpen jeńilgen amerıkalyq boksshy Gabrıel Rosadonyń oıy biraz jerde jatyr. Ol WBO tujyrymy boıynsha orta salmaqtaǵy álem chempıony Demetrıýs Andrademen jekpe-jekke shyqqysy keletinin málimdedi, dep habarlaıdy Egemen.kz.
«Eddı Hırn, jurt qalaǵan keremet jekpe-jek uıymdastyraıyq. Demetrıýs Andradeniń álem chempıony ekeni málim. Alaıda meniń fanattarym kóp. Men – halyq qalaǵan chempıonmyn. Endeshe jankúıerler shyn máninde qyzyǵa tamashalaıtyn shoý uıymdastyrýdan qashpaıyq. Andrade daıyn bolsa, men daıynmyn», dep jazdy ol tvıtterdegi paraqshasynda belgili promoýter Eddı Hırndi belgilep.
Esterińizge sala keteıik, osydan biraz ýaqyt buryn búkilálemdik boks uıymy Jánibek Álimhanulyn Demetrıýs Andradeniń mindetti qarsylasy etip taǵaıyndaǵan bolatyn.