El boıynsha barlyq ekinshi deńgeıli bankter men Qazaqstan qor bırjasynyń jumysy ýaqytsha toqtatyldy. Bul týraly QR Ulttyq bankiniń baspasóz hatshysy Oljas Ramazanov málimdedi.
«Qazaqstan Respýblıkasynyń Qarjy naryǵyn retteý jáne damytý agenttigi men Qazaqstan Ulttyq banki birqatar óńirde kúsh qurylymdarynyń kontrterrorıstik operasııa júrgizýine jáne ınternet júıesindegi ýaqytsha irkilisterge baılanysty, sondaı-aq, qyzmetkerler men qarjy qyzmetterin tutynýshylardyń qaýipsizdigi úshin barlyq qarjy uıymdarynyń sonyń ishinde ekinshi deńgeıli bankterdiń Qazaqstan qor bırjasynan, baǵaly qaǵazdardyń ortalyq depozıtarıiniń jumysyn 2022 jylǵy 6 qańtarda ýaqytsha toqtatý qajettigi týraly habarlaıdy», dedi Ulttyq banktiń baspasóz hatshysy «Habar-24» telearnasyna bergen resmı málimetinde.
Sondaı-aq ol barsha BAQ ókilderin tek resmı aqparat kózderine súıenýge shaqyrdy.
«QR Qarjy naryǵyn retteý jáne damytý agenttigi men Qazaqstan Ulttyq banki azamattar men BAQ ókilderin tek resmı aqparat kózderine súıenýge shaqyrady», dedi Oljas Ramazanov.