Búgin, 14 naýryz kúni Qorqyt ata atyndaǵy Qyzylorda memlekettik ýnıversıtetiniń Stýdentter saraıynda Qazaqstannyń Eńbek Eri Abzal Eralıevpen kezdesý ótti. Bul týraly ýnıverstıtet baspasóz qyzmeti habarlady.
Jıynǵa Abzal Eralıevtiń mekteptegi, stýdent shaqtaǵy ustazdary, dostary, oqý ornynyń professor-oqytýshylary jáne stýdent-jastar qatysty. Kezdesýdi ashqan ýnıversıtet rektory, tehnıka ǵylymdarynyń doktory, professor Qylyshbaı Bısenov «Aq kúrishtiń atasy» atanǵan Syr óńiri elimizdiń áleýmettik-ekonomıkalyq damýy men órkendeýinde ózindik orny bar ólke ekenin atap ótti.
Rektor óz sózinde: «Týǵan aýylyńyzdy túletýge, halyqtyń áleýmettik, turmystyq jaǵdaıyn túzetýge, aýyl jastarynyń bilim alýyna, kásibı shyńdalýyna sizdiń qosyp kele jatqan úlesińiz qomaqty. Siz azamattyq-kásipkerlik ustanymyńyzda izgilikti joǵary qoıa bildińiz. Ýnıversıtet ujymy ózińizdeı túlegin árdaıym maqtanysh tutady», - dedi.
Abzal Eralıev 1977-1982 jyldary sol kezdegi Jambyl gıdromelıoratıvtik qurylys ınstıtýtynda (qazirgi Qorqyt ata atyndaǵy Qyzylorda memlekettik ýnıversıteti) bilim alǵan. Mektep qabyrǵasynda óziniń úlgili tártibi men úzdik úlgirimimen kópke úlgi bola bilgen azamat stýdenttik shaqta da osy úrdisinen tanbady. Árdaıym top bastap, zamandastarynyń kóshbasshysy boldy. Osyndaı sapaly bilim men sanaly tárbıeniń nátıjesinde Abzal Eralıev alǵash úı-qurylys kombınatynda prorab, qurylys ýchaskesiniń bastyǵy qyzmetterin atqardy. 1994 jyldan bastap «Abzal jáne kompanııa» tolyq seriktestiginiń irgesin qalap, ony iri sharýashylyqqa aınaldyrdy.
«Aldymen 500 gektar jerge kúrish ektik. Nátıjesi jaman bolmady. Keıin bastaǵan istiń aýqymyn keńeıttik. Qazir jyl saıyn 5500 gektar jerge kúrish egip, ónim jınap otyrmyz. Bıyl kompanııaǵa 20 jyl tolyp otyr. Osy aralyqta kóptegen tabystarǵa qol jetkizdik. Munyń barlyǵy sharýashylyq qyzmetkerleriniń tynymsyz eńbeginiń nátıjesi», - dedi Abzal Jumashuly kezdesýde.
Qazir Eńbek Eriniń týǵan jeri Keńes Odaǵynyń Batyry N.Ilııasov atyndaǵy eldi meken «HHI ǵasyr aýyly» atanǵan. Aýyl halqy zaman talabyna saı jaryq shamdar, sýburqaqtar, tegis joldar, mádenı-kópshilik nysandardyń ıgiligin kórip otyr. Sonymen birge, bıyl aýylda úlken stadıon salynbaq. Munyń barlyǵy er azamattyń týǵan topyraqqa degen qurmetiniń nátıjesinde júzege asyp jatqany sózsiz. Bir qyzyǵy, bul aýyldy kezinde tap osy Abzal Jumashuly sekildi er eńbektiń taǵy bir maıtalman mamany – Qorqyt ata atyndaǵy Qyzylorda memlekettik ýnıversıtetiniń qazirgi rektory Qylyshbaı Bısenovtiń ákesi, Sosıalıstik Eńbek Eri Aldabergen Bısenov te uzaq jyldar boıy basqaryp, sovhozdy oblystaǵy kúrishten 100 myń sentnerden astam ónim beretin sanaýly sharýashylyqtardyń qataryna qosyp ketip edi.
Kezdesý barysynda jastar Eńbek erine degen kókeılerinde júrgen túrli saýaldaryn joldady. Abzal Jumashulynyń otbasy jaǵdaıy, aldaǵy josparlary, qazirgi jastarǵa degen kózqarasy syndy saýaldar stýdentterdiń qyzyǵýshylyǵyn týdyrdy. Abzal Eralıev jastardyń barlyq suraqtaryna múdirmeı jaýap berdi.
Kezdesý barysynda Qazaqstannyń Eńbek Eri Abzal Eralıevke ýnıversıtettiń ǵylymı keńesiniń sheshimimen «Qorqyt ata atyndaǵy Qyzylorda memlekettik ýnıversıteti bıznes ákimshiliginiń qurmetti doktory» ataǵy berildi.
Árdaıym Syr halqymen jany, bolmysy bir azamatpen kezdesý osylaısha stýdentterge úlken áser qaldyrdy. Eńbek Eriniń jastarǵa aıtqan árbir sózi ómirlik úlgi-ónege bolary sózsiz.
Murat Aıtqoja.
Derekkóz: Qyzylorda memlekettik ýnıversıtetiniń baspasóz qyzmeti.
Foto: Qyzylorda memlekettik ýnıversıtetiniń baspasóz qyzmeti.