Qazaqstandyq ekinshi deńgeıli bankter eldegi jappaı tártipsizdikten kelgen shyǵyndy óteýge óz taraptarynan kómek qolyn sozyp jatyr. Qazaqstan qarjygerler qaýymdastyǵy osyndaı aqparat taratty. Tótenshe jaǵdaı merzimi kezinde aıyppul men ósimpul eseptemeýden bólek, qarjy ınstıtýttary zardap shekken kásipkerler men qarapaıym halyqqa materıaldyq kómek berýdi de jón dep tapqan.
Kaspi.kz jáne kompanııanyń negizin salýshylar Prezıdent tapsyrmasymen qurylǵan «Qazaqstan halqyna» qoǵamdyq qoryna 10 mlrd teńge aýdardy. Buǵan deıin bank birneshe qaladaǵy quqyq qorǵaý organdaryna kóshelerdi patrýldeý úshin 9 brondalǵan ınkassatorlyq kólik syılaǵan edi.
О́z kezeginde Halyk Bank qıraǵan nysandar men ǵımarattardy qalpyna keltirýge jáne zardap shekken shaǵyn jáne kishi kásipkerlik ókilderine 3 mlrd teńge berdi. Buǵan qosymsha, arnaıy qyzmet pen quqyq qorǵaý organdarynyń qaza tapqan qyzmetkerleriniń otbasyna 5 mln teńgeden bóldi. Qazaqstandyq «Sberbank» Almatyǵa kómek retinde 550 mln teńge bólgen. Sonymen qatar medısınalyq mekemelerge 10 jańa reanomobıl kólikteri syıǵa tartyldy. Sondaı-aq qala qajettiligi úshin taǵy 10 jeńil avtokólik te usynyldy. Budan bólek, qarjy uıymy Ulttyq kitaphana jáne Ortalyq memlekettik mýzeı ǵımarattaryn jóndeýden ótkizip, qaıtadan baıaǵy qalpyna keltirýge de kómektespek.
«О́zderiniń qyzmetine kelgen qıyndyqqa qaramastan qazaqstandyq bankter kúrdeli jaǵdaıda jumys kestesin jedel qalypqa keltirip, klıentterge qyzmet kórsete bastady. Olardyń qala ınfraqurylymyn qalpyna keltirý, zardap shekken kásiporyndarǵa, quqyq qorǵaý organdaryna, áskerı qyzmetkerlerge, dárigerlerge jáne azamattarǵa kómek kórsetýdegi kúsh-jigeri erekshe qurmetke laıyq» deıdi qaýymdastyq tóraǵasy Elena Bahmýtova.
Buǵan deıin birqatar kommersııalyq bank TJ kezinde azamattar úshin aıyppul men ósimpul eseptemeıtinin habarlady. Mundaı málimdemeler Halyk Bank, «Sberbank», Kaspi, Jusan Bank, «Nurbank», ForteBank, Bank RBK, «Bank Hoým Kredıt», Altyn Bank, «Alfa-Bank Kazahstan», Bank VTB (Qazaqstan) jáne «Eýrazııalyq bank» qarjy ınstıtýttarynyń resmı saıtynda jarııalandy. Sondaı-aq Kaspi kz, «Alfa-Bank Kazahstan», Altyn Bank, Bank VTB (Qazaqstan) qyzmettik mindetterin oryndaý kezinde qaza tapqan azamattardyń nesıesin keshiretinin aıtqan edi.
Qarjy naryǵyn retteý jáne damytý agenttiginiń 10 qańtardaǵy №8 buıryǵyna sáıkes bankter 5 qańtardan 31 qańtarǵa deıin júgingen klıentterdiń – jeke, zańdy tulǵalardyń jáne jeke kásipkerlerdiń nesıeni óteýdi keıinge qaldyrýdy qamtamasyz etý týraly ótinishterin jeke tártipte qarastyrady. Tótenshe jaǵdaı engizilgen kezde qarjylyq jaǵdaıdyń nasharlaýyna nemese keltirilgen zalalǵa obektıvti sebepter bolǵan jaǵdaıda nesıe tólemin keıinge qaldyrý múmkindigi beriledi. Qosymsha aqparat alý úshin bankke onyń veb-saıtynda nemese mobıldi qosymshada kórsetilgen kontaktiler arqyly habarlasýǵa bolady.