Ulys jeti kún ulyqtalady

Bıyl shyǵys óńiri Naýryz meıramyn erekshe atap ótedi. Iаǵnı ejelgi dástúr  negizinde Ulystyń uly kúnine arnalǵan merekelik is-sharalar memlekettik kúntizbedegi meıramnan jeti kún buryn bas­talady. Ár kúnniń óz urany, is-sharalardy ótkizýge arnalǵan arnaıy taqyryby bar. Ulyq mereke oblysta osylaısha 16 naýryz kúni bastalyp ketedi. Alǵashqy ataýly mereke óńirde «О́nis» kúni bolyp belgilendi. Tabıǵat-ananyń oıanýyn bildiretin bul kúni aıy-kúni jetip bosanǵan analardy perzenthanaǵa baryp quttyqtaý, dúnıe esigin ashqan sábılerge qadirli aqsaqaldardyń bata berýi, oblystyq ádilet departamenti qyzmetkerlerimen birge sábılerdiń týý týraly kýá­likterin tabystaý jáne ozat aýyl eńbekkerlerine qurmet kórsetý kózdelip otyr. Ekinshi kún «Qamqorlyq» dep atalady. Ataýy aıtyp tur­ǵandaı, 17 naýryzda soǵys jáne eńbek ardagerlerin qut­tyqtap, qarııalarǵa qurmet kór­setilmek. Jetim balalar, qarttar úılerine barý­dy uıymdastyrý, muq­taj­darǵa kómek kórsetý de qaras­tyrylǵan. «Tazalyq» atalǵan úshinshi kún túleýge, túrlenýge ún­deı­tin erekshe eńbekke toly kún bolmaq. Jańarýdy, tazarýdy maqsat etken 18 naýryzda kósheler, mekemeler men uıymdardyń aýmaqtary, aýlalar kúl-qoqystan arylady. Al 19 naýryzda «Yn­ty­maq» merekesi atalyp ótedi. Halyqty birlikke úndeıtin bul kúni merekelik is-sharalar ótetin oryndarda merekeniń basty nyshany – «Altybaqan» ornatylady, negizgi merekelik sharalar: konserttik baǵ­dar­lama, túrli baıqaýlar men basqa da óner saıystary et­no­mádenı ortalyqtardyń keńinen qatysýymen uıym­das­tyrylatyn bolady. «Yrys» meıramy atalatyn besinshi merekelik kún aýyl sharýashylyǵy ónimderiniń jármeńkesimen, konserttik keshterimen erekshelenedi. Bul kúni aımaqtyń fermerleri, dıqandary óz ónimderin bazar narqynan tómen baǵalarda saýdalaýǵa múmkindik alady. Iаǵnı óńir jurtshylyǵy úshin molshylyq merekesine aı­nalmaq. Altynshy kúnniń aty – «Shat­tyq». Mádenı-buqa­ra­lyq is-sharalarǵa toly bola­tyn Ulystyń bul kúninde án jáne bı konkýrstary, aıtys, shyǵarmashyl zııaly qaý­ym ókilderimen kezdesý­ler uıymdastyrylady. Kesh­ke jastarǵa arnalǵan oıyn-saýyq, onyń ishinde «Al­ty­baqan», «Aıqysh-uı­qysh», «Aqserek-kókserek», «Al­qaqotan» syndy ulttyq oıyndar ótkizilmek. Áz Naýryzǵa arnalǵan al­ty kún aıaqtalyp, jetinshi kúni shyǵys jurtshylyǵy ısi túrkiniń, kúlli qazaq­stan­dyq­tardyń jyl aınalyp kútken meıramy – Ulystyń uly kú­nin qarsy alady. Kún men tún teńelip, jylqy jyly bo­sa­­ǵadan attaıtyn Ulys kú­nin­­de kóptegen merekelik is-sha­ra­lar ótkizý josparlanyp otyr. – О́ńir basshysy Berdibek Sa­parbaevtyń tapsyrmasy boıynsha bıyl shyǵys óńi­ri Naýryz merekesin osylaı qarsy alýdy josparlap otyr. Jeti kúndi tańdap alýy­myzdyń sebebi, qazaq halqy jeti sanyn qasterleıdi. Bul – jaqsy dástúrge jol ashatyn joba bola ma degen oıymyz bar,– dedi oblystyq mádenıet, muraǵattar jáne qujattama basqarmasynyń basshysy N.Ah­metjanov. Dýman ANASh, «Egemen Qazaqstan». Shyǵys Qazaqstan oblysy.

Salt-dástúrdiń tuǵyry – áz Naýryz

Astanada túnde azdaǵan sýyq bolǵanmen, jylt etken kún kózi qalyń qardyń kóbesin sógip jatyr. Arasynda qar qylaýlap, jańbyr sebelep qoıady. Sóıtip, áz Naýryzdyń lebi sezile bastady. Sonyń bir dáleli Astana qalasy ákimdiginiń Tilderdi damytý basqarmasynyń uıymdastyrýymen «Kongress-Holl» saraıynda ulystyń uly kúni – Naýryz meıramyna arnalǵan «Armysyń, áz Naýryz!» atty merekelik dýmandy kesh der edik. Sóıtip, qanymyzǵa sińisti, janymyzǵa juǵysty, oı-sanamyzǵa nurly shýaq syılap silkindirip-serpiltetin, tilimiz, salt-dástú­rimiz ben ádet-ǵurpymyzdy nası­hattaýǵa tuǵyr bolatyn ata-babamyzdan salt bolyp kele jatqan mere­­kemizdi kópshiliktiń toılaý­yna yqpal etýdi maqsat tutqan is-sharanyń basy elordada bastalyp ketti. Astana qalasynyń Tilderdi damytý basqarmasy jyl saıyn naýryzdyń 11-i men 22-si aralyǵynda «Armysyń, áz Naýryz!» atty qalalyq baıqaý ótkizýdi dástúrge engizgen. Dástúrli sharaǵa aýmaqtyq, jergilikti memlekettik organdar men qurylymdyq, densaýlyq, mádenıet, sport, qoǵamdyq, turmystyq qyz­met kórsetý mekemeleri, saýda ortalyqtary, joǵary jáne orta arnaýly oqý oryndary qatysady. Mere­keniń sońǵy kúnderi úzdik dep tanylǵan mekemeler ákimdik tarapynan arnaıy dıplomdarmen jáne baǵaly syılyqtarmen marapattalady. Naýryz merekesine laıyqtalyp ór­nek­telgen sahna tórinde arnaıy bata oqylyp, keler jylqy jy­lyna juldyz joramal jasalyp, kóńildi kórermenge ásem án áýenimen shashýlar shashyldy. Keshti júrgizýshiler arasynda dástúrli «Toıbastardy» jurttyń ózine bas­tatyp, apa-ájelerge «Besik» jyryn jyrlatyp, «Tusaýkeser» na­qyshyn oryndaǵandarǵa arnaıy syı-sııapattar tabystady. Kesh barysynda Sáýle Jel­dibaeva «Naýryz-dýmandy», Danııar Muhanov «Aıtbaıdy», Klara Tólen­baeva «Aqqý-armandy», Erlan Rysqalı «Aq sısa» men «Segiz aıaqty», Jańabaı О́tegenov «Aıalany», Elena Ábdihalyqova  «Esi­ńe meni alǵaısyńdy» naqyshyna keltire oryndap, kópshilikti rıza etti. Sondaı-aq, sahnada «Naz» mem­lekettik teatrynyń bıshileri bı bılese, «Serper» dombyrashyla­ry kúı kúmbirletti. Aıtysker aqyn­dar Balǵynbek Imashev pen Aı­sáýle Beısenhannyń merekege oraı­lastyrylǵan aıtystary kóp kóńilinen shyqty. Berik SADYR, «Egemen Qazaqstan». Sýretterdi túsirgen Erlan OMAROV.