Atyraý oblysynda úsh kásiporyn jumysshylaryna 21,5 mln teńge qaryz bolyp otyr, dep habarlaıdy Egemen.kz.
Oblys ákiminiń baspasóz qyzmeti málim etkendeı, bul týraly áleýmettik áriptestik pen eńbek qatynastaryn retteý jónindegi oblystyq komıssııa otyrysynda belgili bolǵan.
Atyraý oblysynyń ákimi Mahambet Dosmuhambetovtiń tórǵalyǵymen ótken otyrysqa jumys berýshi jáne jalaqy qaryzy bar kompanııalardyń basshylary qatysty.
Oblystyq memlekettik eńbek ınspeksııa basqarmasynyń basshysy Igilik Áýbákirovtiń aıtýynsha, ótken jyly 83 kásiporyn 1 388 qyzmetkerge 469,3 mln teńge jalaqy qaryzy bolǵan.
«Osyǵan baılanysty tıisti sharalar qabyldanyp, 80 kásiporynda jumys isteıtin 1 212 qyzmetkerge tólenýi tıis 447,8 mln teńge jalaqy bereshegi óteldi. Qazir 3 kásiporyn 176 qyzmetkerge 21,5 mln teńge jalaqysyn tóleı almaı otyr. О́tken jyly 45 jumysshy óndiris kezinde ár túrli dene jaraqatyn aldy», dedi Igilik Áýbákirov.
Komıssııa otyrysynda óńir basshysy jaýapty tulǵalarǵa birqatar tapsyrma júktedi.
«Barlyq kásiporyn, merdiger, qosalqy merdiger kompanııalardyń basshylary jalaqy qaryzy qalyptasýyna jol bermeýi qajet. Mundaı zań buzýshylyqtardy boldyrmaýdy baqylaýda ustaýdy tapsyramyn», dedi ákim.