Bul týraly QR Indýstrııa jáne ınfraqurylymdyq damý mınıstri Qaıyrbek О́skenbaev QR Prezıdenti janyndaǵy Ortalyq kommýnıkasııalar qyzmetinde elimizdiń batys óńirindegi avtojoldardy salýǵa qatysty ótkizilgen qoǵamdyq talqylaý barysynda aıtty, dep habarlaıdy Egemen.kz mınıstrliktiń baspasóz qyzmetine silteme jasap.
QR Parlamenti Senatynyń depýtaty Saǵyndyq Luqpanovtyń suraǵyna jaýap bergen mınıstr Qaıyrbek О́skenbaev Qarabatanǵa deıingi ýchaskeni qamtıtyn uzyndyǵy 86 shaqyrymdyq Atyraý-Dossor jolyna túsetin júkteme rasynda tym kóp ekenin, tıisinshe keńeıtýdi talap etetinine toqtaldy.
«Bul jol ýchaskesi 2009 jyly III tehnıkalyq sanat ólshemderine saı qaıta salyndy. Ol kezde Atyraý men búkil óńir úshin joldyń mańyzdylyǵy eskerilmegen. Ýchaskedegi qozǵalys qarqyny ulǵaıǵanyn eskere otyryp jáne «Qýatty óńirler: el damýynyń draıveri» ulttyq jobasyna sáıkes 2023 jyly I tehnıkalyq sanatqa aýystyrý boıynsha jobalyq-smetalyq qujattamasyn ázirleý kózdelgen. 2025 jyldan bastap qaıta qurýdy bastaýdy tapsyrdym», dedi mınıstr.
Sondaı-aq ol atalǵan ýchaskeni iske asyrý QR Úkimeti bekitken Atyraý oblysyn damytýdyń keshendi josparynda qamtylǵanyn atap ótti.
Budan buryn habarlanǵandaı, QR IIDM el úshin mańyzdy máselelerdi ashyq qoǵamdyq talqylaýdy bastady. Búgin mınıstrlik elimizdiń batys óńirindegi avtomobıl joldaryn salý jáne rekonstrýksııalaý taqyryby boıynsha alǵash ret kezdesý ótkizdi. Is-sharaǵa mınıstr Qaıyrbek О́skenbaev, avtomobıl joldary, qurylys jáne turǵyn úı kommýnaldyq sharýashylyq isteri komıtetteriniń, «QazAvtoJol» ulttyq kompanııasynyń basshylary, QR Parlamenti Senaty men Májilisiniń depýtattary, jýrnalıster, blogerler jáne qoǵam qaıratkerleri qatysty. Sondaı-aq óńir turǵyndary Zoom platformasy boıynsha talqylaýǵa qosyldy.