SARBAZDAR SAPTA JARADY

9 mamyr kúni Máskeý qala­syn­daǵy Qyzyl alańda Uly Jeńistiń 65 jyldyǵyna arnalǵan saltanat­ty sherýge polkovnık Qaıdar Qaraqulovtyń jetekshiligimen Qazaqstan Respýblıkasy Qorǵa­nys mınıstrliginiń 70 sarbazy men 5 ofıserinen turatyn Qurmet rotasy qaraýylynyń jeke quramy qatysqany belgili. Keshe osy oqıǵaǵa baılanysty Astana qalasynyń irgesinde oryn tepken №68665 áskerı bóliminde Qyzyl alańda atalarynyń júrip ótken jolymen elimizdiń Qarýly Kúshteriniń atynan saltanatty sherýge qatysqan sarbazdarmen kezdesý ótti. Kezdesýde Qurmet rotasy qaraýylynyń quramy Máskeýde ótken paradtan alǵan áserlerimen oǵan qatysýǵa júrgizilgen daıyn­dyq jumystary jóninde keńirek áńgimeledi. Munda Qurmet rotasy qaraýylynyń Tárbıe jáne áleý­mettik-quqyqtyq jumys jónindegi komandıriniń orynbasary, aǵa leıtenant Sultan Úmbetálıev, Qy­zyl alańda elimizdiń Qarýly Kúsh­teri atynan Jeńis týyn kótergen kishi serjant Madııar Álkenov, onyń kómekshileri Ashat Raqym­janov pen Temirlan Ádet­baev saltanatty sherýden alǵan áserleri, onda Qazaqstan sar­bazdarynyń sheteldikter tara­pynan joǵary baǵaǵa ıe bol­ǵandary jónindegi oılarymen bólisti. – Biz Áskerı paradqa qatysý úshin Máskeýge 30 sáýir kúni tań­erteń keldik, – dedi aǵa leıtenant S.Úmbetálıev. – Bizdi reseılikter jaqsy qarsy alyp, Máskeý obly­synyń áskerı sanatorııine orna­lastyrdy. Sherýde sarbazdar jaqsy qyrynan kórindi. Bizdiń áskerı­lerdiń saltanatty sapta asqaq kóringenin reseılikter daýystap “Qazaqtar, jaraısyńdar!” dep rızashylyǵyn bildirse, Ulybrıta­nııa, AQSh, Polsha men Fran­sııa­nyń ókilderi bizdiń kózimizshe sarbazdardyń saptaǵy sherýin bas barmaqtarymen baǵalady. Sonymen birge onyń aıtýynsha, sarbazdar Jeńis kúni qarsańynda Kreml, álemde teńdesi joq áskerı tehnıka jáne basqa da qarýly kúshterdiń 300-den asa eksponaty qoıylǵan brondy tankilik murajaıy men Máskeý sırkin tamashalaý múmkin­digine ıe boldy. Dastan KENJALIN.