«Qazaqstan Respýblıkasy Prezıdentiniń «Samuryq-Qazyna» AQ-ny reformalaý máseleleri boıynsha bergen tapsyrmasyn oryndaý maqsatyndaǵy is-sharalar josparyn» júzege asyrý aıasynda KEGOC AQ-da qyzmetkerlerdi áleýmettik qoldaýǵa qatysty birqatar máseleni sheshti, dep habarlaıdy Egemen.kz.
Kompanııada bıylǵy aqpannan bastap qyzmetkerlerdiń eńbekaqylary men tarıftik mólsherlemelerin, atap aıtqanda óndiristik personal úshin ortasha alǵanda 25%-ǵa, ınjenerlik-tehnıkalyq qyzmetkerler men mamandar úshin ortasha alǵanda 18%-ǵa ósirý týraly sheshim qabyldandy.
Bul rette top-menedjmenttiń jáne ortalyq apparattyń orta býyn basshylarynyń jalaqylary kóterilmeıdi.
Sonymen qatar toqsandyq syıaqy mólsheri de ósti, sonyń esebinen jyldyq jıyntyq tabys 2022 jyly jumysshy personal úshin 28%-48%-ǵa, ınjenerlik-tehnıkalyq qyzmetkerler men mamandar úshin 15%-36%-ǵa jáne orta býyn basshylary úshin 10%-15%-ǵa ósedi.
Kompanııa óz qyzmetkerlerin áleýmettik qoldaý máselelerine erekshe mán beredi jáne osy baǵytta qabyldanǵan júıeli sharalardyń arqasynda 10 jyl ishinde «Samuryq-Qazyna» AQ portfeldik kompanııalary arasynda áleýmettik turaqtylyq kórsetkishteri boıynsha kósh bastap keledi.