Elektrondyq format – el ıgiligine

Búginde áleýmettik-eńbek salasynda memlekettik qyzmetterdiń 45 túri bar. 42 qyzmetti (93%) elektrondyq formatta alýǵa bolady. Sonyń ishinde 21 qyzmet (43%) – proaktıvti. Sol 21 qyzmettiń 18-i byltyr zerdelenip, taldanyp, kórseti­le­tin qyzmetterdiń máseleleri men tejeýish fak­torlary anyqtaldy.

– Áleýmettik-eńbek salasyndaǵy mem­lekettik qyzmetterdi sıfrlan­dy­rý­dyń basym baǵyttarynyń biri – olardy elekt­rondy, ásirese proaktıvti formatta kórsetý. Mysaly, bala týýǵa baılanys­ty tólemaqyny alsaq, byltyr jyl basyn­da bul qyzmetti azamattardyń tek 12%-y ǵana alǵan edi. Transformasııalaý ju­my­starynyń aıasynda bıznes prosester ońtaılandyrylyp, 2021 jyldyń sońyna qaraı bul kórsetkish 53%-ǵa deıin ósti. Iаǵnı jylyna shamamen jańa týǵan 440 myń sábıdiń 230 myńǵa jýyq anasy úıden shyqpaı-aq qyzmetti SMS arqyly alady. Bul óte yńǵaıly. Azamattar halyq­qa qyzmet kórsetý ortalyqtaryna baryp, ýaq­­yt joǵaltpaıdy. Sonymen qatar kópbalaly analarǵa ótken jyldyń basynda proaktıvti túrde qyzmet kórsetý kórsetkishi nebári 1% ǵana bolsa, jyl so­ńyna qaraı bul kórsetkish 41%-ǵa deıin artty. Jalpy, Eńbek jáne halyqty áleýmettik qorǵaý mınıstrliginiń aldynda 2025 jylǵa qaraı barlyq memlekettik qyz­mettiń 100%-y elektrondyq format­qa, sonyń ishinde keminde 60%-yn proak­tıv­ti formatqa kóshirý mindeti tur, – dedi spı­ker.

Vıse-mınıstrdiń aıtýynsha, ótken jyl qorytyndysy boıynsha 700 myń aza­mat qyzmetterdi proaktıvti túrde alǵan bolsa, 2025 jylǵa qaraı osy for­mat­ta memlekettik qyzmetter kórsetý kóle­min jylyna 6 mln-ǵa deıin arttyrý jo­s­par­lanyp otyr.

– Densaýlyǵynan aıyrylǵan azamat­tar­­ǵa múge­dek­tik belgilengen kezde, son­daı-aq járdemaqylar men tehnıkalyq ońaltý quraldaryn alǵan kezde tórt túr­li ınstansııaǵa júginýge týra keldi. Aldymen tekserilý úshin muqtaj jan emha­naǵa júginedi. Sonyń nátıjesi boıyn­sha dárigerler qajetti medısınalyq nysan­dy qaǵaz formatta toltyrady. Sodan keıin osy qaǵaz qujattarymen adam mú­ge­­dektikti anyqtaý úshin medısınalyq-áleý­­mettik sarap­tama bólimine barady. Odan keıin járde­maqy alý úshin halyqqa qyzmet kórsetý or­talyqtaryna, al tehnı­ka­lyq ońaltý qu­raldaryn rásimdeý jáne áleýmettik qyzmetter alý úshin ákim­dik­terge júginý qa­jet boldy, – dedi E.Os­p­anov.

Osyǵan baılanysty 2021 jylǵy aqpan­da Ult­tyq qoǵamdyq senim keńesiniń otyry­synda el Prezıdenti múmkindigi shekteýli jandar úshin barynsha qolaıly jaǵdaı jasaýdy, olardyń ınstansııalarda júrýin, qaǵazbastylyqqa salynbaýyn, sondaı-aq qyzmet kórsetýshiler men sol qyz­met­ti tutynýshylardyń baılanysyn bol­dyrmaýdy tapsyrdy.

– Memleket basshysynyń tapsyrmasy sheńberinde biz Densaýlyq saqtaý mınıstrligimen jáne Sıfrlyq damý, ınnovasııalar jáne aeroǵarysh ónerkásibi mınıstrligimen birlesip múgedektigi bar adamdarǵa keshendi qyzmet kórsetýdi transformasııalaý jóninde jumys júr­giz­­dik. Iаǵnı azamat tek turǵylyqty jeri boıynsha emhanaǵa barýy kerek. Qal­ǵany­nyń bári aqparattyq júıelerdi ıntegrasııalaý esebinen adamnyń qatysýynsyz ótedi. Barlyq derek tıisti memlekettik organdarǵa beriledi jáne quzyretti sarapshylar qajetti sheshimder qabyldaıdy. Osy joba aıasynda 2021 jylǵy qazan aıynan bastap, búginge deıin 5 myńnan asa azamat ótinim berdi. Sol ótinimderdiń negizinde tıisti qyzmet aldy. Bul keshendi joba bıyldan bastap Qazaqstannyń barlyq óńirinde iske qosyldy. Jumys áli de jalǵasady ári aýqymy keńeıtiledi. Jyl sońyna deıin biz osy format bo­ıynsha ótinish bildirgender sanyn jalpy júgingen azamattar sanynyń 20%-ǵa deıin arttyrýdy josparlap otyrmyz. Bul shamamen aıyna 4-5 myń múgedektigi bar adam degen sóz, – dedi vıse-mınıstr.

Taǵy bir másele sheshildi. Buǵan deıin múgedektik belgilengennen keıin azamattar jyl saıyn ákimdik janyndaǵy ju­myspen qamtý jáne áleýmettik baǵ­darlamalar bólimderine baryp, ońal­tý­dyń tehnıkalyq quraldary men qyz­met­te­rin alýǵa ótinish jazatyn edi. Sodan keıin keıde birneshe aıǵa sozylatyn mem­le­kettik satyp alý rásimderi ótip jata­tyn.

– Osyndaı problemalyq máselelerdi boldyrmaý úshin byltyrdan bastap áleý­met­tik qyzmetter portaly iske qosyl­dy. Onda azamattar taýar nemese qyzmet jetkizýshisin óz betinshe tańdaı alady. Memleketke tek jetkizip berýshige shy­ǵyndardy óteý ǵana qalady. Osy por­taldy engizý esebinen 2019 jylmen salystyrǵanda (qamtamasyz etý kór­setkishteri 62% deńgeıinde boldy) kórsetkish 2021 jyly 88%-ǵa deıin ulǵaıdy. Bul buryn múgedektigi bar adam­dar úshin ártúrli sebeptermen 100 myń qyzmet kórsetilmegenin bildiredi, – dedi spıker.

Bıyl mınıstrlik portalda qanat­qaq­ty rejimde ınvataksı qyzmetin engi­zýdi josparlap otyr. Bul qadam ınva­tak­sıdiń múgedektigi bar adamdar úshin qoljetimdiligin arttyrýǵa múmkindik be­re­di. Sondaı-aq bıyldan bastap 17 qyz­met túri qyzmet kórsetýdiń eksterrıto­rııa­ly qaǵıdaty boıynsha usynylady.

– Birinshi kezekte byltyr 3 qyzmet túri iske qosyldy. Sol jyldyń sońy­na qaraı taǵy 14 túri qosylyp, jalpy, 17 qyzmet túri eksterrıtorııaly prın­sıp­pen kórsetiledi. Bul degenimiz ne? Mysaly, bir adam Nur-Sultan qala­sy­nyń turǵyny bola turyp, ýaqytsha Almaty qalasynda bolsa, ol Almaty qala­synyń kez kelgen halyqqa qyzmet kórsetý ortalyǵyna júgine alady jáne ózi­ne tıesili áleýmettik tólemdi alý úshin ótinish bere alady. Bul barynsha yńǵaıly ári azamattardyń qyzmet alý shy­ǵyndaryn azaıtady. Joba iske qosyl­ǵan sátten bastap, 2021 jyldyń tórtinshi toq­sanynda 22 myń azamat paıdalanyp úlgerdi, – dedi E.Ospanov.

Sonymen qatar prosesterdi ońtaı­lan­dyrý esebinen áleýmettik tólemderdi uıymdastyrýǵa arnalǵan operasııalyq shyǵystardy tómendetý qadamdary da josparlanyp otyr.

– Qyzmet kórsetýge qatysty opera­sııa­lyq shyǵyndardy únemdeý maqsatyn­da azamattardyń shottaryna áleýmettik tólemderdi aýdarý úderisterin ózgertý boıynsha jumys júrgizildi. Bul ózgeris­ter 2021 jyldyń 7 aıynda ǵana memleketke shamamen 3 mlrd teńgeni únemdeýge múmkindik berdi. Al tutastaı alǵanda, bul tetik bıyl shyǵystardy 6 mlrd teń­ge­ge deıin únemdeýge jol ashady. Bul kór­set­kish odan artyq bolýy múmkin, – dedi vıse-mınıstr.

Taǵy bir joba – memlekettik qyzmet­ter­di bank platformalarynda usyný. Byltyr qazan aıynda mınıstrlik eki bankpen birlesip, olardyń platforma­la­rynda balanyń týýyna baılanysty memlekettik qyzmet kórsetý boıyn­sha jumys atqardy. 2021 jyldyń IV toqsanynda 16 myń azamat bank plat­for­malary arqyly qyzmet aldy. Qa­zirgi kezde basqa bankter de birge ju­mys isteýge usynystaryn bildirýde. Ve­dom­st­vo osy baǵyttaǵy ashyq ári tıimdi ju­mys­ty aldaǵy ýaqytta da jalǵastyra bermek. Sondaı-aq Eńbek jáne halyqty áleýmettik qorǵaý mınıstrligi úshin ne­giz­­gi basymdyqtardyń biri 2021 jyly ha­­lyqty jumyspen qamtý sa­la­syndaǵy mem­lekettik qyzmetterdi transformasııa­laý boldy. Sıfrly ju­mys­pen qamtý ortalyqtary engizildi. 2020 jyldyń qarasha aıynan bastap kezeń-kezeńimen qa­natqaqty joba iske qosyldy.

– Joǵalǵan nemese jumys izdep júr­gen adam elektrondyq eńbek bırjasy portaly arqyly onlaın rejimde qyz­met ala alady. Sonyń esebinen ýaqyt únem­deýge, shyǵyndy qysqartýǵa, ju­mys­qa ornalasýdaǵy adamı faktordy bol­­dyrmaýǵa bolady. 2021 jyly jumys izdep júrgen adam retinde tirkeýge óti­nish bildirgen adamdardyń arasynan 143 myń azamat ony elektrondyq eńbek bırjasy portaly arqyly alýy­na múmkindik paıda boldy. Bul – óti­nish­­­terdiń jalpy sanynyń 33%-y ǵana. Bul adamdardyń 66%-y onlaın re­jimde jumysqa ornalas­ty. Qyzmet kórsetý merzimi 10 kúnnen 3 kúnge deıin qys­qar­tyldy. Onlaın tirkeý memleket sýb­sıdııalaıtyn jumys oryndaryna da qol jetkizýge múmkindik beredi, – dedi spı­ker.

E.Ospanov bul baǵyttaǵy jumystar áli de jalǵasatynyn jetkizdi. Bıyl ju­mys­pen qamtý servısterin elektron­dyq úkimet portalyna shyǵarý jáne olardy onlaın rejimde kórsetý josparlanyp otyr.