Memleket basshysy Nursultan Nazarbaev Úndistannyń Syrtqy ister mınıstri Somanahallı Mallaıah Krıshnany qabyldady, dep habarlady Qazaqstan Respýblıkasy Prezıdentiniń baspasóz qyzmeti.
Kezdesýdiń barysynda eki eldiń arasyndaǵy saýda-ekonomıkalyq jáne mádenı-gýmanıtarlyq yntymaqtastyqty odan ári damytý máselesi talqylandy.
Mınıstr Qazaqstan Prezıdenti júrgizip otyrǵan saıasatqa joǵary baǵa berdi, sonyń nátıjesinde el ekonomıkasy óte qarqyndy damýda.
Ol sondaı-aq Nursultan Nazarbaevtyń qolǵa alýymen Qazaqstannyń elordasy – Astananyń salynýy qarqyndy júrgizilýine óz tańdanysyn bildirdi.
Somanahallı Mallaıah Krıshna Úndistan men Qazaqstan arasynda óte tyǵyz dostyq baılanystar qalyptasqanyn atap ótti. Buǵan ótken jylǵy qańtardaǵy Qazaqstan Prezıdentiniń Úndistanǵa memlekettik sapary barysynda ulttyq mereke – Respýblıka kúnine qurmetti qonaq retinde qatysýy naqty dálel bola alady.
– Qazaqstan Prezıdentiniń sapary eki el arasyndaǵy qarym-qatynastardy odan ári damytýǵa aıtarlyqtaı serpin berdi. Bizdiń elderimiz arasyndaǵy saıası jáne ekonomıkalyq baılanystar belsendi damýda. Qazaqstan bizdiń jaqyn kórshimiz bolyp tabylady. Eki el arasyndaǵy yntymaqtastyqty odan ári nyǵaıtýǵa erekshe mán beremiz. Ekonomıka men áleýmettik salany qosqanda, barlyq saladaǵy bizdiń yntymaqtastyǵymyzdy keleshekte údetýge “jol kartasyn” ázirleý nıetindemiz. Biz birlese otyryp osy óńirdegi turaqtylyqty nyǵaıtýǵa kómektese alamyz, – dedi Úndistannyń Syrtqy ister mınıstri jýrnalısterge arnalǵan brıfıngte.