Ksell aksıonerlik qoǵamyna 16 mlrd. teńge kóleminde aıyppul salyndy. Ol Básekelestikti qorǵaý agenttiginiń júrgizgen tekseristeri nátıjesinde anyqtaldy. Bul týraly BNews.kz habarlady.
«Tergeý nátıjeleri boıynsha belgili bolǵandaı, Qoǵam naryqtaǵy óziniń ústemdigin paıdalana otyryp, Activ brendimen usynylatyn «Kúndizgi lımıtsiz» tarıftik jospary boıynsha tutynýshylarǵa qyzmet kórsetpeı-aq abonenttik tólemdi sheship alyp otyrǵan, sondaı-aq uıaly baılanys qyzmetin usyný erejelerin buza otyryp Kcell brendindegi abonenttiń balansy 0-ge teńelgende baılanys (radıotelefon arqyly sóılesý, ınternet jelisine qosylý) qyzmetin toqtatpaǵan», - delingen habarlamada.
Agenttik aqparyna qaraǵanda, Almaty qalasynyń mamandandyrylǵan ákimshilik sotynyń 2014 jylǵy 7 naýryzdaǵy sheshimimen qoǵam «Ákimshilik quqyq buzýshylyqtar týraly» Kodeksiniń 147-baby 3-tarmaǵynda qarastyrylǵan zań buzýshylyqty jasaǵany úshin aıypty dep tanylyp, oǵan 16 mlrd. teńge aıyppul salyndy.
Murat Aıtqoja.
Derekkóz: BNews.kz.