Abaı atyndaǵy QazUPÝ-dyń Basqarma tóraǵasy - rektor Darhan Bilálov ýnıversıtettiń belsendi stýdentterimen jáne jastar komıtetiniń múshelerimen Town Hall formatynda kezdesý ótkizdi, dep habarlaıdy Egemen.kz.
Is-sharaǵa áleýmettik damý jónindegi prorektor Shyńǵys Nurlanov jáne Akademııalyq máseleler jónindegi departament dırektory Haırýlla Janbekov qatysty. Kezdesý onlaın jáne oflaın formatta ótti. Karantın sharalaryna baılanysty 200-den astam stýdent ZOOM platformasy arqyly qatysty.
Darhan Bilálov bilim alýshylardy tárbıeleý jáne damytý boıynsha jumysta ýnıversıtet pen ınstıtýttar basshylyǵynyń tiregi bolyp tabylatyn stýdenttik aktıvpen osyndaı kezdesýlerdiń mańyzdylyǵyn atap ótti. Sondaı-aq, stýdentterdiń turmys jaǵdaıyn bilý úshin jataqhanalardy aralap, ondaǵy stýdenttermen kezdeskendigin, ýnıversıtette júrgizilip jatqan jumystardyń nátıjesi stýdentter arqyly baǵalanatyndyǵyn sóz etti. Sondyqtan aldaǵy ýaqytta da stýdenttermen jıi kezdesip, barlyq saýaldary men usynystaryn tyńdaýǵa daıyn ekendigin aıtty.
Stýdentterdiń suraqtaryna jaýap bergen rektor zamanaýı stýdentterdiń bilim berý salasyndaǵy tehnologııalardy meńgerýdegi múmkindikterin aıtyp, oqý úderisinde qoldanylatyn platformalardyń erekshelikterine toqtaldy. Ýnıversıtettiń ınfraqurylymdyq jáne tehnıkalyq oqý qurylǵylarymen qamtamasyz etilý máseleleri kezeń-kezeńimen sheshilip jatqandyǵyn, máseleni tolyq sheshý qarajat pen ýaqytty qajet etetindigin túsindirdi. Bul rette, árıne, akademııalyq prosesterge basymdyq beriledi dedi.
Rektor Darhan Bilálov pedagogtyń róli men onyń mártebesi týraly stýdentterdiń esine saldy. «Búginde pedagog qyzmetiniń mańyzdylyǵy jáne onyń el men óskeleń urpaq aldyndaǵy jaýapkershiligi aıtarlyqtaı artty. Sondyqtan sizder jańa bilim men daǵdylardy ıgerip, olardy únemi jetildirip otyrýlaryńyz kerek. Bul sizderdiń bolashaqtaryńyz úshin mańyzdy. Bolashaq pedagog retinde stýdentter qazirdiń ózinde óz aldyna kásibı jaýapkershilikti arttyrý mindetin qoıa bilýi kerek», dedi rektor.
Shyńǵys Nurlanuly jataqhanaǵa qatysty saýaldarǵa jaýap bere otyryp, ýnıversıtette bilim sapasyn arttyrý, bilim salasyna ózgeris engizý maqsatynda qolǵa alynyp jatqan jobalardyń birine toqtaldy. Bul joba álemniń kóptegen joǵary oqý oryndarynda júıeli qoldanylyp júrgen Honors College jobasy. Jobanyń maqsaty – pedagogıkalyq mamandyqtar boıynsha oqıtyn daryndy stýdentterge tereń bilimmen qatar daǵdylardy berý. Ol úshin emosıonaldy ıntellekt, krıterıaldy baǵalaý júıesi, bilim alýshylardyń, ásirese mamandandyrylǵan mektepterde (NZM, RFMM, BIL, BINOM jáne t.b.) zertteý daǵdylaryn damytý syndy baǵyttar boıynsha daryndy stýdentter qatary jasaqtalyp, sertıfıkattalǵan oqytý baǵdarlamalary engiziledi.
«Biz elimizdegi eń úzdik pedagogıkalyq joǵary oqý orny bolǵandyqtan, daryndy stýdentterimizdi mamandandyrylǵan jetekshi mektepterge praktıkaǵa jiberetin bolamyz. Ol úshin atalmysh joba aıasynda jańa ınnovasııalyq bilim berý baǵdarlamalaryn ázirlep, bilim alýshylardyń bilimin jan-jaqty jetildiremiz», dedi prorektor.
Departament dırektory Haırýlla Janbekov oqý úderisi men oqý formaty, aýysý, akademııalyq utqyrlyqqa qatysty jıi qoıylatyn suraqtarǵa jan-jaqty jaýap berdi.
Town Hall formatyndaǵy kezdesý beıresmı bolǵandyqtan, qatysýshylar ádette, óz ıdeıalary men pikirlerin, usynystaryn erkin bildirip, suraqtar qoıady. Osyndaı kezdesýlerdiń arqasynda ýnıversıtet aldynda turǵan ózekti máseleler boıynsha óz pikirlerin qalyptastyra alatyn bilim alýshylardyń, professor-oqytýshylar men qyzmetkerlerdiń sany artady.
Kezdesý sońynda rektor Darhan Bilálov stýdentterdiń suraqtary men usynystaryn talqylap, kóterilgen máselelerdiń sheshilýi baqylaýda bolatynyn aıtyp, jaýapty tulǵalarǵa naqty tapsyrmalar berdi.
Almaty