QR Syrtqy ister mınıstri Muhtar Tileýberdi Donesk jáne Lýgansk halyq respýblıkalaryndaǵy jaǵdaıdyń ýshyǵýyna baılanysty vedomstvo qazaqstandyqtardy Ýkraınadan evakýasııalaý joldaryn qarastyryp jatqanyn aıtty, dep habarlaıdy Egemen.kz.
«Bizdiń Kıevtegi elshilik qazir tolyq jumys isteıdi. Bul Ýkraınadaǵy bizdiń azamattarymyzben baılanysty. Árıne, olardy evakýasııalaý joldary qarastyrylady. Sondyqtan, qandaı da bir soǵys qımyldary bolǵan jaǵdaıda, Qazaqstan azamattary Kıevtegi elshiligimizben shuǵyl baılanysa alady», dedi QR Syrtqy ister mınıstri.
Onyń aıtýynsha, qazirgi ýaqytta qazaqstandyq dıplomattar Ýkraınada ornalasqan.
«Ýkraınada bizdiń dıplomattar áli de bar. Soǵys jaǵdaıynda bizdiń vedomstvo evakýasııalaý josparlaryn júzege asyratyn bolady», dep qosty Muhtar Tileýberdi.
Ol, sondaı-aq, Qazaqstanda Donesk jáne Lýgansk halyq respýblıkalaryn taný týraly másele kóterilmegenin habarlady. Qazaqstannyń túpkilikti ustanymy Qaýipsizdik Keńesiniń otyrysynda qabyldanady.