Májilis Tóraǵasy Erlan Qoshanov Aqmola oblysyna baryp, óńirdegi birqatar óndiristik jáne áleýmettik nysandardyń jaǵdaıymen tanysty. Saılaýshylarmen kezdesýge oblys ákimi Ermek Marjyqpaev ta qatysty, dep habarlady Májilistiń baspasóz qyzmeti.
Erlan Qoshanov saparyn elordadan 30 shaqyrym jerde ornalasqan Shortandy aýdany Bozaıǵyr aýylyndaǵy kolledj-mektep-ınternattan bastady. Munda aýylsharýashylyq mashınalaryn jasaý, dánekerleý, qoǵamdyq tamaqtandyrý boıynsha jáne aqparattyq tehnologııa salasyna mamandar daıarlaıdy. 445 orynǵa arnalǵan bul mekemede búginde 148 adam bilim alýda.
Májilis Spıkeri kolledjdiń materıaldyq-tehnıkalyq bazasymen tanysyp, professor-oqytýshylar quramymen, stýdenttermen jáne jergilikti turǵyndarmen áńgimelesip, túıtkildi máselelerdi tyńdap, onyń sheshý joldaryn talqylady.
Áńgime barysynda Májilis Tóraǵasy elimizdegi búgingi ahýalǵa toqtaldy. «Qasiretti qańtar» oqıǵasy kezinde jastarymyzdy arandatýshylar óz múddelerine paıdalanyp ketti. Aldaǵy ýaqytta osyndaı keleńsizdikterge jol bermeý úshin jastarǵa jumys berip, olardy ónimdi eńbekpen qamtamasyz etýimiz qajet. Jastardyń bolashaqqa aıaǵyn nyq basýy úshin olar mamandyq ıesi atanýlary kerek. Sondyqtan biz respýblıka boıynsha osy saladaǵy orta arnaýly bilimdi damytýǵa jaǵdaı jasap jatyrmyz. Shynynda da qańtar oqıǵasynda Prezıdenttiń batyl sheshimderi bolmasa biz búgin bolashaqtyń máselesin talqylap turmaıtyn edik», dedi E.Qoshanov.
Jıyn barysynda belgili bolǵandaı, Aqmola oblysynyń ákimdigi atalǵan kolledjdi jańǵyrtýǵa maqsatty qarjy bólý týraly sheshim qabyldady. Depýtattar bul jumysty baqylaýǵa alyp, orta arnaýly oqý oryndaryna akademııalyq derbestik beretin zań jobasy boıynsha jumysty da jedeldetpek. Bul olardyń suranysqa ıe mamandyqtar boıynsha mamandar daıarlaýǵa múmkindik beredi.
Odan ári Májilis Tóraǵasy qala men jaqyn mańdaǵy eldi mekenderdi jylý jáne elektr energııasymen qamtamasyz etip otyrǵan Stepnogor qalasynyń jylý elektr ortalyǵynda boldy. Kásiporyn qyzmetkerleri óz jumystary men keleshegi týraly aıtyp, Stepnogor qalasyndaǵy turǵyn úı-kommýnaldyq sharýashylyq júıesiniń jaı-kúıine erekshe nazar aýdardy. Erlan Qoshanov Stepnogor qalasy turǵyndarynyń máselelerinen jáne magıstraldyq jelilerdiń tozyǵy jetkeninen habardar ekenin atap ótti. Osy oraıda oblys, qala basshylyǵyna qajetti qujattamany daıyndap, bıýdjettik ótinim joldaýdy usyndy. «Biz óz tarapymyzdan Úkimetke tıisti saýaldar joldaımyz», dedi Palata Spıkeri.
Kezdesý barysynda qoǵamda keńinen talqylanyp jatqan kóppáterli turǵyn úılerdi basqarý fýnksııalaryn menshik ıeleri qaýymdastyǵyna berý máselesi qozǵaldy.
E.Qoshanov turǵyndarǵa qyzmet kórsetý shyǵyny mol kópqabatty shaǵyn úılerdi basqarý boıynsha óz usynystaryn Májiliske engizýdi usyndy.
Májilis Tóraǵasy jumys sapary aıasynda Bógenbaı batyr atyndaǵy oblystyq olımpıadalyq rezervtiń mamandandyrylǵan mektep-ınternat-kolledjiniń ustazdary jáne oqýshylarymen de kezdesti. Áńgimelesý barysynda Májilis Tóraǵasy sport mektebiniń tárbıelenýshileri ár jyldary bir emes, birneshe ret Qazaqstannyń namysyn halyqaralyq deńgeıde laıyqty qorǵaǵanyn atap ótti.
Sonymen qatar Erlan Qoshanov mektep-ınternatta týyndaǵan janjaldy jaǵdaıdan, oǵan Memleket basshysy nazar aýdaryp, pikir bildirgeninen habardar ekenin aıtty. Májilis Tóraǵasy oqýshylar arasynda tárbıe jumysyn kúsheıtýdi tapsyrdy. Aıta ketý kerek, 2000 jyly Qasym-Jomart Toqaev elimizdiń Premer-Mınıstri bolǵan kezde bul mektepke, ashylǵannan keıin birden kelýiniń ózindik máni bar.
Májilis Tóraǵasy belgilengen tapsyrmany joǵary deńgeıde oryndap otyrǵan «Qazaqstannyń jylyjaı tehnologııalary» kásipornynyń ujymymen birge agroónerkásip keshenin jáne jalpy óńirdegi kásipkerlikti damytý máselelerin talqylady. Bul rette Májilis Spıkeri turǵyndar úshin qoljetimdi baǵa men ósiriletin ónimniń joǵary sapasyn saqtaýdyń mańyzdylyǵyna toqtaldy. Sondyqtan kompanııanyń odan ári damýy mańyzdy ekenin aıtqan Palata Tóraǵasy búginde memleket sharýalarymyzǵa barynsha qoldaý kórsetýge tyrysyp, qazirdiń ózinde túrli qoldaý quraldary engizilgenine nazar aýdardy. Bul – ınvestısııalyq sýbsıdııalar, tyńaıtqyshtardyń, pestısıdterdiń, bıoagentterdiń qunyn sýbsıdııalaý, jeńildetilgen nesıeler.
Sapar barysynda Májilis Tóraǵasy jumys istemeı turǵan balabaqsha ǵımaratyn aralap, Stepnogor qalasynyń turǵyndarymen de kezdesti. Turǵyndar ǵımaratty Oqýshylar saraıyna aınaldyryp, qalpyna keltirýge Májilis depýtattarynan kómek surady. Osyǵan oraı Májilis Tóraǵasy Memleket basshysynyń 2025 jylǵa qaraı balalardy mektepke deıingi tárbıemen 100 paıyz qamtý týraly tıisti tapsyrmasyn atap ótip, bul maqsatty júzege asyrýdaǵy negizgi quraldardyń biri memlekettik tapsyrys arqyly bıznesti tartý ekenin aıtty. Májilis Tóraǵasy balabaqshany jóndeýge jergilikti bıýdjet esebinen nemese basqa da kózderden qarjy bólýdi ákimdikke usyndy.
Májilis Tóraǵasy oblystaǵy medısına qyzmetkerleriniń túıtkildi máseleleri men usynystaryn tyńdap, «Vıamedıs» JShS fılıalynda dárigerlermen kezdesti. Halyqty sapaly medısınalyq qyzmetpen qamtamasyz etýde memleket pen bıznestiń yntymaqtastyǵynyń tıimdiligine toqtalǵan Erlan Qoshanov memleket-jekeshelik áriptestigi múmkindikterin keńinen paıdalanýdy usyndy. Bıznes mindetti medısınalyq áleýmettik saqtandyrý jáne basqa da memlekettik tapsyrys quraldarynyń múmkindikteri arqyly medısınalyq mekemelerdi salady jáne kadrlardy tartady, memleket qarjylandyrady.
Kezdesý sońynda Aqmola oblysynyń turǵyndary Memleket basshysy Qasym-Jomart Toqaevqa elimizdegi beıbitshilik pen turaqtylyqty saqtaýǵa múmkindik bergen «Qasiretti qańtar» oqıǵasy kezindegi batyl áreketteri úshin qoldap, alǵystaryn joldady.
Qazaqstandyqtar memleketti odan ári damytý el ishinde ózara túsinistik pen kelisim bolǵan jaǵdaıda ǵana múmkin ekenin biraýyzdan qoldaıdy. Kórshi memleketterde oryn alǵan oqıǵalar muny taǵy da aıqyn dáleldep otyr.