Kids go free: Ishki týrızmge serpin bere me?

Mádenıet jáne sport mınıstrliginiń boljamy boıynsha mundaı jeńildik demalystyń shyǵynyn 30 paıyzǵa deıin azaıtýǵa múmkindik beredi. Al atalǵan vedomstvonyń vıse-mınıstri Erjan Erkinbaevtyń aıtýynsha, «Kıds goý frı» týrpaketin Qazaqstanda tirkelgen resmı týroperatorlardan satyp alýǵa bolatynyn aıtady.

«Áýe bıletteri nege sýbsıdııalanady? Sebebi qazaqstandyqtarǵa balalarymen elimizdiń basqa da óńirlerine saıahat jasap, jas jetkinshekterge kórikti jerlerimizdi kórsetýi maq­satynda memleket tarapynan sýbsıdııa beriledi. Elimizde kórse kóz toıa­­tyndaı ásem jer­lerimiz jeterlik. Sonymen qatar Qazaqstanda 13 ulttyq saıabaq bar. El turǵyndarynyń basym bóligi óz óńir­lerinen tys jerlerge shyǵyp kórmegen. Endi osy baǵdarlamanyń ıgiligin paıdalanyp, basqa da óńirlerge erkin saıahat jasap, ásem jerlerimizdi tamashalaı alady», dedi Erjan Erkinbaev.

Mádenıet jáne sport mınıstrligi Týrızm ındýstrııasy komıtetiniń tóraǵa­­sy Dastan Ryspekov bir saıahatqa kete­tin shyǵynnyń boljamdy esebin shyǵaryp berdi.

«Eger siz týroperatordy tartpaı, óz betińizshe ushatyn bolsańyz, sáıkesinshe sizge balalar bıletiniń quny sýbsıdııa­lanbaıdy. Al týroperatordyń qyz­metine júginetin bolsańyz, bul jaǵ­daıda vaýcherdiń quny 20-30 paıyzǵa arzan bolady. Mysaly, bir otbasy Nur-Sultannan Alakólge úsh balasymen bir aptaǵa saıahat jasaıdy delik. Jatyn oryn men ushaq baǵasyn qosa eseptegende ol otbasynyń shyǵyny shamamen 350-400 myń teńge bolýy múmkin. Bul somanyń 100 myń teńgesi balalar úshin baryp-qaıtý bıletterine ketedi. Endi joǵarydaǵy 350 myńnan 100 myń teńgeni alsaq, bul demalystyń quny 250 myń teńgeni quraıdy. Sondyqtan siz otandyq týroperatordyń uıymdastyrylǵan demalysyn paıdalanatyn bolsańyz, jańa baǵdarlamanyń múmkindigimen az qarajatqa saıahattap kelesiz», dep sendirdi Dastan Ryspekov.

Qaı baǵyttarǵa tegin ushýǵa bolady?

Tegin áýe bıletteri ázirge týrıs­tik salany damytýdyń 2019-2025 jyldarǵa arnalǵan memlekettik baǵdar­la­masynda aıqyndalǵan basym týrıstik aımaqtar­dyń (BTA) top-10 baǵyty boıynsha ǵana qoljetimdi. Olarǵa myna aımaq­tar kiredi: Alakól kóli, Almaty óńiri­niń taý klasteri, Shýche-Býrabaı, Baıan­aýyl Imantaý-Shalqar kýrortty aı­maq­tary, Balqash kóli, Túrkistan oblysy, Mańǵystaý jaǵajaı demalys aımaqtary, Nur-Sultan qalasynda MICE-týrızmdi damytý (korporatıvtik is-sharalardy uıymdastyrý jáne ótkizýge baılanysty iskerlik týrızm jáne Baıqońyr ǵarysh aılaǵy.

Tegin bıletter men balalar sanyna shekteý joq. Degenmen saparǵa shyǵý aldynda mynadaı birneshe jaıtty eskergen jón. Máselen, Kids go free qosylǵan týrıstik ónimdi satyp ala otyryp, balalar týrıstik oryndardyń aýmaǵynda keminde bes kún jáne tórt tún turýǵa mindetti. Eger siz birden birneshe jerge barýdy josparlasańyz, onda kem degende eki kún jáne bir tún sol orynda bolýyńyz kerek. Turý ýaqytynyń jalpy sany bes kúnnen jáne tórt túnnen kem bolmaýy qajet. Bul jaǵdaıda ba­la­lar­ǵa arnalǵan tegin áýe bıletteri birin­shi lokasııadaǵy áýejaıǵa deıin jáne sońǵy lokasııadaǵy áýejaıdan usy­nylady. Iаǵnı siz bir emes birneshe ret ushýdy kózdeseńiz, eń alǵashqy jáne sońǵy reıstiń bıleti ǵana tegin bolady. Eki mekenjaıdyń arasyndaǵy bıletter men kólik shyǵyndaryn óz qaltańyzdan tóleısiz.

Sondyqtan ár jerde keminde bes kún jáne tórt tún turý arqyly týrıstik qyzmetterdi satyp alǵan tıimdi. Osy sharttar boıynsha balalarǵa arnalǵan tegin bıletter barlyq jerdegi áýejaı arasynda usynylatyn bolady.

Baǵdarlama týysqan aralaýǵa arnalmaǵan

Balalarǵa arnalǵan tegin áýe bılet­teri Kids go free opsııasy qosylǵan otandyq týrıstik ónimder aıasynda ǵana qoljetimdi bolady. Bul rette baǵdar­lamanyń talaptary boıynsha bir eresek adammen (ata-ana nemese balanyń zańdy ókili) eki baladan artyq usha almaıdy. Iаǵnı bir eresek adam eki balamen ushady. Úshinshi bala úshin taǵy bir eresek bılet alý kerek. Baǵdarlama bir balasy bar otbasy úshin de, kópbalaly otbasylar úshin de qoljetimdi.

Siz qonaqúılerde, otelderde, lagerlerde, týrıstik bazalarda, demalys úılerinde, pansıonattarda tura alasyz. Al týysqandarǵa nemese dostarǵa barý úshin bılet tegin bolmaıdy.

Týrpaketter ishki týrızm salasyn­daǵy týroperatorlar men týragentter arqyly nege beriledi? О́ıtkeni turatyn jerdiń baǵasy suranys pen usynys negizinde jasalady. Sondyqtan turý sharttary, tamaqtaný jáne basqa opsııa­lar týrısterdiń qalaýyna jáne týr­operator tańdaǵan ornalasý múmkin­dikterine baılanysty.

Alǵashqy týrıstik joldama satyldy

Atalǵan baǵdarlamaǵa osy kúnniń ózinde 10 otandyq týroperator qosylǵan. Onyń biri «Kıds goý frı» boıynsha alǵashqy týryn da satyp úlgeripti. Bul – О́skemen qalasynyń «Artýr» týrkompanııasy. Kompanııanyń dırektory Aıjan Omarbaeva osy alǵashqy týrdyń naýryz aıyna josparlanǵanyn aıtady. Týǵan ápkesi senimhat negizinde baýyrymen Naýryz meıramyn toılaý maqsatynda bes kúnge Túrkistanǵa saıahattaıdy. Týrdyń quramyna ushý, turý, mindetti pýnktter, sondaı-aq kúnine úsh ret tamaqtaný, transfer, ekskýrsııalyq baǵdarlama jáne gıd kiredi.

«Baǵdarlama josparlanǵan kólemde jumys isteıdi dep úmittenemin, óıtkeni biz ony kútip, ony ázirleýge qatystyq. Bul baǵdarlama boıynsha suranys bar, qońyraýlar óte kóp. Alakólge jazǵa ótinimder bar», dedi ol.

Baǵdarlamaǵa qosylǵan SkyWay týroperatory­nyń dırektory Ásem Qozybaǵarova naýryz aıynda demalǵy­sy keletinderdiń qatary kóp ekenin aıtty. «Biz Almaty men Almaty ob­ly­sy­nyń, Túrkistannyń kórikti jer­le­rine, sondaı-aq jazda Kaspıı teńizi­niń jaǵasynda jaǵajaı demalysyn usynamyz. Meniń oıymsha, Kids Go Free baǵdarlamasy jalpy ishki týrızmdi damytý úshin jáne otbasylardyń týrıstik paketterge degen suranysyn arttyrý úshin jaqsy. Bul proseste biz barlyq qatysýshyǵa jumys isteýge yńǵaıly bolý, kedergilerdi azaıtý jáne t.b. ere­jelerdi jetildire alamyz», deıdi Á.Qozybaǵarova.

Al Limon Travel týroperatorynyń dırektory Almas Maratulynyń piki­rinshe, Kids Go Free baǵdarlamasy týrónimniń jalpy chegin tómendetedi. Tıisinshe, týroperatorǵa týrlardy satý ońaıyraq bolady.

«Baǵdarlamanyń sharttaryn biz ózimiz, týroperatorlar talqylaý barysynda ózgerttik. Mysaly, bastapqyda týrıst 4 tún, 5 kún turatyn týr satyp alýy kerek dep josparlanǵan bolatyn. Biz bir túnge deıin qysqartýǵa qol jetkizdik. Suranysqa keletin bolsaq, kóptegen adam bul jaı ǵana Qazaqstan boıynsha balalarǵa arnalǵan tegin áýe bıleti dep oılady. Biraq biz klıentterge áýe bıletin ǵana emes, týrıstik ónimdi de, mindetti túrde turý, basqa da qyzmetterdi satyp alý kerektigin túsin­diremiz», dedi ol.

Týrkompanııalardyń aıtýynsha, qazirgi tańda atalǵan baǵdarlama bo­ıynsha jazǵy maýsymǵa, ásirese Alakólge suranys kóp túsýde. Sondaı-aq Batys aımaǵynan joǵary suranys túsip jatyr eken. Batys óńiriniń Almaty, Túrkistan sııaqty týrıstik aımaqtardan alys ornalasqanyn eskersek, demalys kezinde eki-úsh kún temirjolmen júrgenshe, maqsatty baǵytyna bir-eki saǵattyń ishinde jetý yńǵaıly ekeni aıqyn. Bul rette balalar áýe bıletteri tegin bolǵan jaǵdaıda, «Kıds goý frı» baǵdarlamasy boıynsha týrlarǵa suranys tek joǵarylaı túsedi dep jos­parlaýda týrıstik naryq ókilderi.

Kazakh Tourism ulttyq kompanııa ókilderiniń aıtýynsha, mundaı baǵdarlamanyń memleket deńgeıinde qoldanylýy – álemdik tájirıbede bol­maǵan jaǵdaı. Zań kúshine engen shara merzimsiz qabyldanǵan. Osy jylǵa bıýdjette baǵdarlamamen kem degende 20 myń balany qamtý kózdelse, suranys artqan jaǵdaıda, qosalqy qarajat tartylatyny eskerilgen. Eki jyl boıy pandemııadan zardap shekken týrızm salasyna endigi kezde jańadan dem berildi dese bolady. «Kıds goý frı» arqyly, el ishinde saıahattaımyn deıtin januıaǵa 30%-ǵa deıin únemdeý múmkin bolyp otyr.