Jýyrda Almaty qalasyndaǵy «Alataý» dástúrli óner teatrynda «Ágýgáı men Igıgáı» mýzykalyq ertegisiniń premerasy ótken edi. Bıylǵy «Balalar jyly» aıasynda usynylǵan qoıylym rejısseri ári ınssenırovka avtory – Nurjan Tutov.
Aıta keteıik, bul rejısserdiń debıýttik qoıylymy. «Qasqyr men eginshi», «Aldar kóseniń aılasy», «Kúı qudireti» atty tanymdyq ertegiler dástúrli ándermen árlenip, Ágýgáı men Igıgáı keıipkerleri arqyly bir jelide baıandalǵan.
Italııan teatrlarynyń elementteri astasqan qoıylym akter obrazdary, kostıýmder stıli, kóshe teatryn beıneleıtin arbalardyń bezendirilýimen erekshelendi. Ansambldiń súıemeldeýi spektakl kórkemdigin arttyryp, balalarǵa arnalǵan týyndynyń tyń baǵytyn ańǵartady. Rejısser oıdan shyǵarylǵan keıipkerlerge Ágýgáı men Igıgáı esimderin tańdaý arqyly halyq ánderine basymdyq bergendeı.
Úsh ertegini bir arba arqyly kórsete bilgen qoıylymnyń alǵashqysy – «Qasqyr men eginshi». Jaqsylyqqa jamandyqpen jaýap berýge bolmaıtynyn aıtatyn bul ertegide túlki obrazy balalarǵa kóńil kúı syılap, tárbıelik jaǵynan da jaqsy áser qaldyrdy. Al sahnaǵa halyq ertegilerinen tanymal ári kópshiliktiń súıikti keıipkeri – Aldar kóse shyqqanda kishkentaı kórermenniń qýanyshy erekshe boldy.
Sondaı-aq «Kúı qudireti» ańyz ertegisi – Aq bóken beınesimen este qalyp, obraz jasaýda kostıýmer men horeograftyń eńbekteri anyq kórindi. Iаǵnı janýardy beıneleýde birlesken jumys sahnalyq sulýlyqty bere alǵan.
Aıta keteıik, áni men bıi, oıyn-saýyǵy ushtasqan qoıylymdy eńbektegen baladan bastap tamashalaı alady. Teatr repertýaryndaǵy bul jańalyq búldirshinderge tárbıelik máni men mazmuny jaǵynan olja bolmaq.