Fransııalyq «PSJ» fýtbol klýbynyń shabýylshysy Neımar ıspanııalyq «Realǵa» qarsy ótken oıynnan keıin komanda qaqpashysy Djanlýıdjı Donarýmmamen eregisip qaldy degen áńgime taraǵan bolatyn. Fýtbolshy bul sybysty joqqa shyǵarǵan jazba qaldyrdy, dep habarlaıdy Egemen.kz.
«Jarııalanǵan jańalyqtar týraly áńgime qozǵaǵandy jek kóremin. Kıim aýystyratyn bólmede eshqandaı tóbeles bolǵan joq. О́z jumysyna salǵyrt qaraıtyn jýrnalıster bizdiń atymyzdy paıdalanyp tanylǵysy keledi. Ekeýmizdi tóbelese jazdady degen de bos áńgime. Sondyqtan mundaı áńgimelerge nazar aýdarmaǵan jón», dep jazdy fýtbolshy ınstagramda.
Sondaı-aq brazılııalyq shabýylshy WhatsApp-taǵy ekeýara jazbany da jarııalady. Aldymen Donarýmma Neımarǵa qaıyrylǵan eken. «Eı, Neı, keshegi áńgime úshin keshir. Mundaı jańalyqtar mıǵa qonymsyz», degen Donarýmmanyń jazbasyna Neımar: «Dosym, fýtbolda mundaı dúnıeler bolyp turady» dep jaýap bergen.