Ol kisiler aýyl irgesindegi qorymdardan topyraq tompaıtqaly qashan?! Marqash (Marhaba) apa bertinde, 2020 jyldarǵa taman attansa, Imekeń, Imanjan aqsaqal toqsanynshy jyldardyń aıaq sheninde jóneldi-aý deımin. Biz onda jeti-segiz jasar balamyz. Aýyldyń eki qarııasy da jaqsy esimde. Imekeń óle-ólgenshe attan túspeı ketti. Toqsannyń birnesheýine kelip qaıtty. Aıaq artyp júrgen atyn balasy syrtynan satyp jiberipti.
«О́stip júrip, attan qulap nemese at súrinip bir jerde mert bolsań, sózge qalamyz» dep. Sóıtse, qara shal jylqydan bir bıesin úıretip minip alypty. Sońynda qulyny shurqyrap júretin. Jaǵdaısyzda emes, jalǵyz balasy ákim, qazaq attan túsip, temir tulparǵa taqym artqan kez ǵoı. Shamasy, shańyraqta shaldan basqa atqaminer joq. Bizdiń ataǵa jıi soǵyp, áńgimelesetin. Bektas batyrdyń márttigin, Aınataıdyń erligin aıtyp jylap otyrar edi. «Kirer qalmady» dep egiletin. Baryp, sher tarqatysyp, áńgime aıtar úı qalmady degeni eken ǵoı sondaǵysy. Eskilikti, kóneniń adamy sol kezdiń ózinde azaıǵan, qazir ne sor?
Marqash apa da kóneniń kózi, kópti kórgen, bolystyń qyzy. Ánshi bolǵan desedi. Áńgimeniń maıyn tamyzar edi. Seksenge kelgenshe gazetti kózildiriksiz oqyp ótti. Aqsúıek, oqyǵandyǵy men mundalap turatyn. Joldasynan erte qalyp, uldaryn ózi jetkizgen. Bir uly mezgilsiz dúnıe salyp, kóńili qaraly bolǵanynyń ústine qonaqasyna soıatyn qara tabylmaı otyrǵanda, Imekeń kóńil aıta kiredi. Osy toqsanynshy jyldardyń basynda. Aýyldyń atqaminer aqsaqaly Imekeń mán-jaıdy bilgen soń qapaly kempirdiń bosaǵasyna túsip, astyndaǵy atyn baılap ketipti. «Osyny alyp soıa berińder, kemi eli-barmaq qazy beredi. Aqysy kerek joq» depti de, ertoqymyn bir jigittiń kóligine saldyryp, álgimen úıine tartyp otyrypty. Ul-qyzy qalaǵa oqýǵa ketken, aldy endi aıaqqa tura bastaǵanymen, jetilip kete qoımaǵan, myna qaıtqany jap-jas jigit qana, jalǵyz zeınetaqyǵa qarap qalǵan kempirdiń jaǵdaıy belgili emes pe? Sony aıtqyzbaı uqqan Imekeńniń márttigi aýyl-aımaqta áli kúnge aıtylyp qalyp júredi. О́zi de keremet dáýlet quraǵan jan emes. О́miri Keńes ókimetine qyzmet etpeı, at ústinde ótken qart aýyl-eldiń máselesin bir aýyz sózben sheship júrgeni týraly áńgimeler bar.
Sol Imekeń óleriniń aldynda tósek tartyp jatyp balasyn shaqyryp, «men ólsem neshe jylqy soıasyń?», dep surapty. О́limge qımaǵanymen, kesip aıtqandy súıetin ákesin biletin balasy «onyń ne, áke?» deı almaı, «úsh jylqy soıamyn» dese kerek. «Onda ólýge bolady eken» dep, sol jatqanynan turmapty.
«Kezikseń bizdiń jaqtyń
tentegine,
О́mirdiń qaramaıdy keltesine.
Úıdegi jalǵyz atyn
soıyp berip,
Júgenin ustap
qalar ertesine»
degen qazaqtyń eski óleńi de qazir kóp estile bermeıdi.