Elimiz damýdyń jańa kezeńi – Jańa Qazaqstanǵa aıaq basty. Bul bizdiń san ǵasyrlyq tereń tarıhymyzdaǵy betburysty jáne taǵdyrly sát. Búginde álem kúrdeli de qaýipti kezeńdi bastan keshirýde. Qarýlaný men jahandyq azyq-túlik daǵdarysynyń qaýpi artyp keledi, janjaldar kúsheıip, áskerı qaqtyǵystar týyndap jatyr, aýqymdy sanksııalar engizilýde, klımat ózgerip, koronavırýs pandemııasy jalǵasyp keledi.
Bul jahandyq tendensııalar Qazaqstannyń júıeli problemalaryn anyq kórsetti. Mundaı jaǵdaıda syndarly ózgerister men evolıýsııalyq jańǵyrý ǵana qıyndyqtardy eńserip, elimizdiń turaqty damýyn qamtamasyz etedi. 2022 jylǵy qańtar qasiretin bastan keshirgen Qazaqstan halqy jumylǵan judyryqtaı birigip, radıkalızm men ekstremızmge qarsy turdy, progress pen ıgi ózgeristerdiń jalǵasyn tabýyn qalady.
Qasym-Jomart Toqaev Prezıdent qyzmetine kirisken sátten beri elde júıeli reformalardy kezeń-kezeńimen júrgizip keledi. Qazirdiń ózinde memleket pen qoǵamnyń barlyq salalaryn qamtıtyn keshendi reformalar júzege asyryldy. El men halyq aldynda tarıhı jaýapkershilik alǵan Prezıdent Qazaqstan halqyna Joldaýyn jarııalap, elimizdi saıası, ekonomıkalyq jáne áleýmettik turǵyda reformalaýdy tereńdetýge baǵyttalǵan aýqymdy reformalar josparyn usyndy.
Amanat partııasy Qazaqstan Prezıdentiniń júıeli jáne keń aýqymdy reformalaryn tolyǵymen qoldaıdy. Memleket basshysynyń reformatorlyq baǵytynyń aıasynda Amanat partııasy ózgeristerdi ózinen bastap, ishki transformasııany qolǵa aldy.
Biz reformalar baǵytyna balama joq ekenine senimdimiz. Saıası lıberalızasııa jáne áleýmettik ádilettilik – bul azamattardyń ótinishterine der kezinde berilgen jaýap. Biz barsha qazaqstandyqtardy birlik pen yntymaqqa, barlyq qoǵamdyq-saıası kúshterdi toptasýǵa shaqyramyz.
Biz barlyq kúsh-jigerimiz ben qýatymyzdy Memleket basshysynyń Joldaýyn júzege asyrýǵa baǵyttaýǵa daıynbyz. Bizdiń birligimiz nyǵaıǵanda ǵana táýelsizdik pen memlekettilikti berik etemiz, ortaq Otanymyz ben barlyq azamattardyń ál-aýqatyn arttyra alamyz!
Ashat ORALOV,
Amanat partııasynyń atqarýshy hatshysy