Kezinde Talas aýdanynyń ortalyǵy bolǵan Aqkól aýyly keıingi jyldary birshama qıyndyqty bastan keshti. Toqsanynshy jyldary tozyp, toqyraýǵa ushyraǵan aýylda másele kóbeıgen bolatyn. Tipti turǵyndardyń áleýmettik jaǵdaıy álsiz bolǵan soń olardyń birazy týǵan aýyldan taban aýdarǵan edi.
Alaıda arada biraz jyl ótken soń memleket qoldaýynyń nátıjesinde Aqkól aýyly qaıta túlep, jańarý jolyna tústi. Prezıdent Qasym-Jomart Toqaevtyń aýyldy jerlerge tıisti kóńil bólý týraly tapsyrmasyna oraı Aqkól búginde qaıta jańǵyryp keledi. Talaı jyldan beri aýyl turǵyndaryn tolǵandyrǵan máseleler sheshimin tabýda. Kópshiliktiń kótergen máselelerine qulaq asqan Talas aýdanynyń ákimi Qanatbek Mádibek aýyldy kórkeıtý maqsatynda áli talaı jumys atqarylatynyn aıtady.
Jergilikti jurtshylyq talaı ýaqyttan beri jol azabyn tartyp kelgen edi. Búlingen, tozǵan aýylishilik joldar memleket qoldaýynyń nátıjesinde qaıta qalpyna keltirilýde. Bul kúnde aýyldaǵy 25 kósheniń 20-syna asfalt tóselipti. Sondaı-aq burynǵy kolledjdiń eski ǵımaraty kúrdeli jóndeýden ótip, 200 oryndyq №6 Talas aýdandyq arnaýly áleýmettik qyzmetter usyný ortalyǵy bolyp jańadan ashylǵan. Munda 172 adam jumyspen qamtylǵan. Negizinen olardyń basym bóligin aýyl turǵyndary quraıdy. Bul arqyly aýyldaǵy jumyssyzdyq máselesi de oń sheshimin taýyp otyr. Endi qazirgi tańda aýylda sport kesheni salynýda. Atalǵan sport kesheniniń quny 336 mln teńgeni quraıdy. Jobanyń qurylysy bıylǵy maýsym aıynda aıaqtalyp, paıdalanýǵa beriledi. Sonymen qatar aqkóldikter biraz jyldan beri aýylǵa gaz tartý máselesin kóterip keledi. Osy oraıda atalǵan másele de eskerilip, qazirgi tańda Jýaly aýdanynyń Bılikól aýylynan beri qaraı gaz qubyry tartylýda. Bul qubyr arqyly Aqkól aýylyna jáne osy aýylǵa jaqyn birneshe aýylǵa da jyl sońyna deıin gaz beriledi dep josparlanǵan. Sonymen qatar aýyldyqtar úshin jer máselesi de ózekti. Bul rette Aqkól aýyldyq okrýginiń ákimi Jandos Ratov aýylda 3 463 gektar jer bar ekenin, endi mal jaıylymy 5 964 gektarǵa ulǵaıyp otyrǵanyn aıtty. Al turǵyndardyń qajettiligine oraı 210 gektarǵa jýyq jaıylym jáne egistik jerler memleket menshigine qaıtarylǵan.
Búginde memleket tarapynan berilgen túrli múmkindikti paıdalanyp, aýyl turǵyndarynyń jaǵdaıyn jaqsartý da qolǵa alynǵan. Máselen, aýylda «Bastaý bıznes» jobasymen 24 adam oqyp, sonyń ishinde 11 aýyl turǵyny 6,5 mln teńge qaıtarymsyz grantqa ıe bolǵan. Qazirgi kezde olar jeke kásippen aınalysýda. Onyń ishinde 9 adam mal basyn kóbeıtse, 1 azamat shashtarazdyń qural-jabdyqtaryn jáne 1 turǵyn kondıterlik pesh alyp, óz kásipterin bastap ketken. Sonymen qatar 7 aýyl turǵyny túrli memlekettik baǵdarlamalarǵa qatysyp, jalpy kólemi 19,8 mln teńge jeńildetilgen nesıe alǵan. Sondaı-aq oblys ákiminiń bastamasymen júzege asyrylǵan «Jomart túlek» jobasy boıynsha aýyl túlekteriniń demeýshiligimen jalpy kólemi 11,5 mln teńgege «Táýelsizdik alleıasy», «Túlekter alleıasy» jáne strıt-vorkaýt sporttyq alańshasy salynyp, Y.Altynsarın atyndaǵy orta mekteptiń aýlasy abattandyrylǵan. «Asarlatyp úı salý» jobasy da tıisinshe júzege asýda.
Alaıda aýylda turǵyndardy alańdatatyn máseleler de bar. Máselen, «Sultan» kanalyna sý rettegish qondyrǵy salý jáne jańa jedel járdem kóligin alý qajet. Sondaı-aq turǵyndardyń deni oblys ákimi Berdibek Saparbaevtan bıznes ıdeıasyn júzege asyrý maqsatynda memlekettik grant qarastyrýdy surap otyr. Sol sııaqty aýyldan áleýmettik dúken ashý úshin jeńildetilgen nesıe alǵysy keletin azamattar da bar. Al oblys basshylyǵy turǵyndar kótergen aýyl mektebin jóndeý men jańa ambýlatorııa salý máseleleriniń de sheshiletinin aıtýda. Sondaı-aq keıingi jyldary aýyldyqtar úshin sý máselesi de ózekti bolyp otyr. Osy oraıda «Aqkól» sý qoımasy kúrdeli jóndeýden ótken. Endi aldaǵy mamyr aıyna deıin atalǵan sý qoımasyna keminde 90 mln tekshe metr sý jınalýy kerek. Jaýapty basshylar «Aqkól» sý qoımasynyń jaǵdaıyn nazarǵa alsa, talaı jyldan beri kúrmeýi sheshilmeı kelgen sý máselesi de oń sheshimin tabady.
Jambyl oblysy