Elimizde ońaltý ortalyqtaryna degen suranys artyp keledi eken. Bul óńirlerde densaýlyǵynda týabitti kemistigi bar adamdardyń sany da kóbeıgenin bildiredi. О́kinishke qaraı, mamandardyń kómegine muqtaj jandardyń deni balalar bolyp otyr. Iаǵnı dimkás balalardy ońaltý ortalyqtarynyń tapshylyǵy máselesi kún tártibinde tur.
Derek boıynsha, elimizde mundaı balalardy medısınalyq ońaltý ortalyqtarynyń jalpy sany kóp emes eken, 153 ortalyq qana turaqty jumys istep otyrǵan kórinedi. Al em alýǵa muqtaj balalar sany 90 myńǵa jýyqtaǵan. Bul másele oblystarda, onyń ishinde aýdandar men aýyldarda tipten ótkir tur dese de bolady.
Árıne, memleket tarapynan jaǵdaıdy ońtaıly sheshýdiń qadamy bar. О́ńirler de óz kúshimen problemany sheshýge umtylyp jatyr. Mysalǵa, osyndaı ıgi is Almaty oblysynda bastalǵaly birshama ýaqyt boldy. Qazir aımaqta 11 ońaltý ortalyǵy jumys isteıdi. Onyń tórteýi taza memlekettik mekeme eken.
Jaqynda Sarqan qalasynda 40 balaǵa arnalǵan «Senim» ońaltý ortalyǵy ashyldy. Ortalyqta zamanaýı arnaıy qural-jabdyqtarmen jabdyqtalǵan 22 kabınet, 55 joǵary bilikti maman qyzmet etýde. Sonymen qatar bul mekemege balalardy tasymaldaýǵa arnalǵan arnaıy jańa avtokólik bólingen. Munda 8 baǵytta qyzmet kórsetiledi. Atap aıtqanda, qyzmet alýshylarǵa áleýmettik-mádenıet, áleýmettik-ekonomıka, áleýmettik-psıhologııa, áleýmettik-medısına, áleýmettik-quqyq salalary boıynsha kómek beriledi. Budan bólek nysan aýlasy abattandyrylyp, balalarǵa arnalǵan oıyn alańqaılary da jasaqtalǵan.
– Mundaı ortalyqtardy meılinshe kóptep ashqan jón. Erekshe kútimdi talap etetin balalardy úıde ustamaý kerek. Balany arnaıy bilikti mamandarǵa aparý arqyly qandaı da bir jetistikterge jetýge bolady. Sarqan aýdanynda ashylǵan ortalyqtyń ereksheligi, bul jerde balalardy tańnan keshke deıin qaldyrýǵa bolady. Sondaı-aq shalǵaı aýyldardan qatynaıtyndar ata-anaǵa osy ortalyqta 6 aıǵa deıin qalyp, em qabyldaýyna bolady», deıdi Almaty oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Marjan Muratqyzy.
Al sál buryn dál osyndaı ońaltý ortalyǵy Jambyl aýdanynyń Uzynaǵash aýylynda ashylǵan bolatyn. Munda ortalyq aýrýhananyń ákimshilik ǵımaratyna kúrdeli jóndeý júrgizilip, kólemi 810 sharshy metrdi quraıtyn arnaıy oryn paıdalanýǵa berilgen. Qazir bul ortalyqta otyzdan astam múmkindigi shekteýli bala turaqty áleýmettik kómek alyp otyr. Al Jambyl aýdanynda kómekke muqtaj 200-ge jýyq bala bar eken.
Endi balalardy ońaltý ortalyǵy Panfılov aýdanynan da ashylmaq. Jaqynda oblys ákimi Qanat Bozymbaev osy aýdanǵa jasaǵan sapary barysynda Jarkent qalasyndaǵy ákimdiktiń rezıdensııasyn balalardy ońaltý ortalyǵyna aınaldyratynyn aıtty.
– Sóz reti kelgende aıta keteıin, osy Jarkent qalasynda oblys ákiminiń rezıdensııasy tur. Jeriniń kólemi – 1 gektar. Maǵan sol rezıdensııanyń qajeti joq. Aýdanda qonatyn jap-jaqsy qonaq úıler bar. Tamaqty dámdi daıyndaıtyn dámhanalar kóp. Sondyqtan rezıdensııany balalardy ońaltý ortalyǵyna ótkizip beremin. Bul balasynyń ómir súrýi úshin ár sátin kúrespen ótkizip jatqan, erekshe balalardy baǵyp-qaǵyp otyrǵan ata-anaǵa óte kerekti ortalyq bolar edi dep oılaımyn, – dedi Panfılov aýdanynda turǵyndarmen kezdesý ótkizgen Q.Bozymbaev.
Al Jarkenttegi oblys ákiminiń rezıdensııasy 2013 jyly salynǵan bolatyn. Bir qabatty ǵımarattyń jalpy aýdany 910 sharshy metr eken. Aldaǵy kezeńde ákimdik ǵımarattyń balalardy ońaltý ortalyǵyna aınalýy aımaqtaǵy medısına kómegine muqtaj erekshe balalardy qýantary sózsiz.
Almaty oblysy