Semeıde sporttyq jáne jaýyngerlik sambodan Qazaqstan chempıonaty óz máresine jetti. Bul jarys KSRO sport sheberi, álemniń ardagerler arasyndaǵy eki dúrkin chempıony, kúrestiń osy túriniń órkendeýine ólsheýsiz úles qosqan elimizdiń eńbek sińirgen jattyqtyrýshysy Kereı Qoıshybekti eske túsirýge arnaldy. Úsh kúnge sozylǵan beldesýler barysynda respýblıkamyzdyń barlyq aımaǵynan kelgen 470 balýan baq synap, 23 júlde jıyntyǵyn sarapqa saldy.
Kózi tirisinde-aq Kereı Qoıshybektiń «Sambonyń akademıgi» atanǵanyn jankúıerler jaqsy biledi. Aıtýly azamat tabany kúrekteı 18 jyl boıy Qazaqstan ulttyq quramasynyń bas bapkeri (1992-2010 jyldar) boldy. Sol ýaqyt aralyǵynda bizdiń jigitter tek álem chempıonattarynda 10 altyn jáne 50-den asa kúmis pen qola medaldi ıelendi. Odan bólek, Álem kýbogy, Azııa birinshiligi jáne basqa da dúbirli dodalarda tolaǵaı tabystarǵa qol jetkizdi. Sonyń arqasynda otandyq samboshylarymyz jer-jahandaǵy eń úzdik komandalardyń sanatyna erkin qosyldy. Onyń aldynda aıtýly bapker elimizdiń jastar quramasyn 10 jyl boıy jattyqtyrdy. Bul jarystarda da Keraǵanyń shákirtteri oza shapty. Sonymen qosa ózi de egde tartqansha baýyry ystyq boz kilemnen esh alystaǵan joq. Túrli jarystarǵa qatysyp, qanjyǵasy únemi maılanyp júrdi. Eń ǵajaby, Qoıshybek alpystan asyp, jetpiske jeter tustyń ózinde sambo men dzıýdo kúresinen ardagerler arasynda birneshe ret álem chempıony atandy.
Pandemııa kúlli álemdi sharlaǵan kezde talaı jaqsylarymyz ben jaısańdarymyzdan aırylyp qaldyq. Sol indettiń kesirinen byltyrǵy kóktemde, 74 jasqa qaraǵan shaǵynda Kereı Qoıshybek te jaryq dúnıemen qosh aıtysty. Biraq onyń artynda ólmeıtin isi, asyl murasy jáne qalyń shoǵyr shákirtteri qaldy. Mine, sol azamattar bıylǵy Qazaqstan chempıonatyn ózderiniń ulaǵatty ustazdarynyń rýhyna arnaýdy qup kórgen eken. Bul bastamany Aıdos Aqjanov jetekshilik etetin sporttyq jáne jaýyngerlik sambo federasııasy biraýyzdan qoldady. Keraǵanyń týǵan inisi, elimizdiń eńbek sińirgen jattyqtyrýshysy Mereı Kóshkin, jastar men jasóspirimder arasyndaǵy álem chempıony, eresekter arasyndaǵy Azııa chempıony, álem birinshiliginiń qola júldegeri Qaırat Kúnsafın jáne taǵy basqa kóptegen shákirti atalǵan jarystyń asa joǵary deńgeıde ótýine barynsha kúsh saldy.
Sóıtip, Semeıdegi sport keshenine jınalǵan kórermender úsh kún boıy boz kilemdegi «jan alysyp, jan berisken» beldesýlerdiń kýási boldy. Erler saıysynda birneshe tosyn nátıjeler tirkeldi. Atap aıtsaq, kileń saıdyń tasyndaı iriktelgen jigitter jınalǵan 64 kılo salmaq dárejesinde asa daryndy balýan Esentaı Imahanov dara shyqty. Bastapqy beldesýlerinde nebir saqa sportshylardy san soqtyrǵan 20 jastaǵy Semeı óńiriniń týmasy jartylaı fınalda álem birinshiliginiń kúmis júldegeri, túrkistandyq Kemelbek Moldashty jyǵyp, jergilikti jankúıerdi bir jelpindirip tastady. Aqtyq synda ol qaraǵandylyq Rahat Jańanıetpen kúsh synasty. Arqa tósinen kelgen samboshynyń 2018 jylǵy álem chempıony degen ataǵy bar. Biraq áıgili qarsylasynan esh qaımyqpaǵan Esentaı ony de eńserip, bas júldeni qanjyǵasyna baılady.
71 kılo salmaqtaǵy taldyqorǵandyq Arnur Qýataıdyń da óneri kópshiliktiń kóńilinen shyqty. Jastar arasyndaǵy álem birinshiliginiń kúmis júldegeri jarysty bir demmen ótkizdi. Qarsy kelgenderin alyp ta, shalyp ta jyqqan Arnur sheshýshi tusta álem jáne Azııa chempıony, kóptegen halyqaralyq jarystyń jeńimpazy, oraldyq Nurbol Serikovti san soqtyryp, jeńis tuǵyrynyń eń bıik satysyna kóterildi.
Al ózge salmaq dárejelerinde myna balýandar bas júldeni oljalady: 53 kılo – Mereı Sádý (Atyraý), 58 kılo – Qaıyrberdi Aıdynbaı (Atyraý), 64 kılo – Márlen Jańǵabyl (Qaraǵandy), 88 kılo – Elaman Qoıshybaev (Aqtóbe), 98 kılo – Álibek Zekenov (Nur-Sultan) jáne + 98 kılo – Temirlan Kólbaı (Batys Qazaqstan).
Jalpykomandalyq esepte Atyraý oblysynan kelgen samboshylardyń asyǵy alshysynan tústi. Olar 2 altyn men 1 qolany oljalap, jarys kestesinde kósh bastady. Qaraǵandy (1 altyn +2 kúmis + 1 qola) men Batys Qazaqstan oblystarynyń (1+2 +1 qola) ókilderi ekinshi jáne úshinshi oryndardy ózara bólisti. Almaty (1+1+5) men Aqtóbe oblystarynyń (1+1+2) órenderi tórtinshi jáne besinshi satylarǵa turaqtady.
Burymdylar arasyndaǵy jarysta Almaty oblysynyń qyzdary aldaryna jan salmady. Jeti júldege qol jetkizgen olar aıdy aspanǵa bir-aq shyǵardy. Ásirese, biz 72 kılo salmaqta beldesken Dildásh Quryshbaevanyń asqan sheberligine tánti boldyq. Baqyt Qoqysbekovteı bilikti bapkerden tálim-tárbıe alǵan ol – búgingi tańda ulttyq qurama sapyndaǵy eń beldi samboshylardyń biri ári biregeıi. Olaı deýge negiz, Quryshbaeva 2013-2021 jyldar aralyǵynda ótken álem chempıonattarynda alty ret jeńis tuǵyryna kóterildi. Sol medaldardyń úsheýi kúmis jáne úsheýi qola. Onyń syrtynda Azııa oıyndarynyń jeńimpazy, qurlyq birinshiliginiń birneshe dúrkin jeńimpazy jáne basqa da tolyp jatqan ataqtary bar. Bul joly da Dildásh óziniń deńgeıi men dárejesine saı óner kórsetti. Barlyq beldesýin merziminen buryn aıaqtaǵan balýan fınalda oraldyq Rıza Súleımenovany sanaýly sekýndtarda «aýyrtý» ádisimen utty. Atalǵan komandanyń qorjynyna taǵy bir altyndy Araılym Ábenova (+80 kılo) salsa, Dınara Jumabaeva (59 kılo) kúmis aldy. Al Gúlnast Nurdınova (54 kılo), Aınur Tórebaı (59 kılo), Janar Qashqyn (65 kılo) jáne Gúljaına Bısenova (80 kılo) qola medaldi enshiledi.
Chempıonat aıaqtalǵan bette Almaty oblysynyń aǵa jattyqtyrýshysy Bolat Qojahmetovpen az-kem suhbattasýdyń sáti tústi. «Otandyq sambonyń órkendeýine barlyq kúsh-qajyryn jumsaǵan maıtalman maman Kereı Qoıshybekti eske alýǵa arnalǵan el chempıonatyna biz tyńǵylyqty daıarlanyp, komandalyq saıysta qalaı da top jarýdy kózdedik. Sol úshin de kóp eńbektendik, izdendik. Aqyry júıeli túrde júrgizilgen jumys óz nátıjesin berdi. Semeı tórinde jasyndaı jarqyldaǵan Jetisý óńiriniń órenderi 4 altyn, 2 kúmis jáne 9 qola medaldi oljalap, mamandardyń súıispenshiligine bólendi. Jáne de bul jeńisimizdi biz Keraǵanyń rýhyna arnaımyz! Shyny kerek, ol kisiden biz kóp nárse úırendik. Kereı Qoıshybek óz isine shynaıy berilgen naǵyz maıtalman maman edi. Qazir ondaı azamattar aramyzda tym sırek», dep Bolat bapker kózine jas aldy.
Sonymen qatar altynnan alqa taqqandar arasynda qaraǵandylyq Margarıta Bajaeva (50 kılo) men Ajar Salyqova (65 kılo), mańǵystaýlyq Gúldana Álmuhanbetova (54 kılo), shymkenttik Marjan Bızaq (59 kılo) pen Azman Amaeva (80 kılo) syndy balýan qyzdar bar. Jalpy esepte Jetisý óńirinen kelgen komandadan bólek, Qaraǵandy (2+0+2), Shymkent (2+0+0), Mańǵystaý (1+0+0) jáne Batys Qazaqstan oblystarynyń (0+3+0) qyzdary tabysty óner kórsetip, aldyńǵy lekten kórindi.
Jaýyngerlik samboshylardyń saıysynda myna sańlaqtar jeńis tuǵyrynyń eń bıik satysyna kóterildi: 53 kılo – Arman Turymbetov (Aqtóbe), 58 kılo – Mıras Ýálıev (Almaty), 64 kılo – Ádilbek Seısov (Batys Qazaqstan), 71 kılo – Áset Anarbaev (Shymkent), 79 kılo – Asylbek Smaıylov (Shyǵys Qazaqstan), 98 kılo – Mádı Raıhan (Shyǵys Qazaqstan) jáne +98 kılo – Talǵat Jıentaev (Qostanaı).