QR Parlamenti Senaty janynan «Ulttyq múdde» atty jańa dıalog alańy quryldy. Bul týraly Senat tóraǵasy Máýlen Áshimbaev málimdedi, dep habarlaıdy Egemen.kz.
«Qazirgi tańda elimizde úlken tarıhı kezeń bastalýda. Prezıdentimiz Qasym-Jomart Kemeluly Toqaevtyń bastamasymen Jańa Qazaqstandy qurýdy qolǵa aldyq. Bul kúrdeli ózgeristerdiń jedeldeýine qasiretti qańtar oqıǵasynyń da áseri zor boldy. Endigi jerde ótken qaıǵyly oqıǵalardy saraptap, olardan durys qorytyndy shyǵarý asa mańyzdy. Bul bizdiń baıandy bolashaǵymyz úshin sheshýshi mánge ıe», dedi Senat tóraǵasy.
Onyń aıtýynsha, Jańa Qazaqstandy qurý jolynda depýtatarǵa zııaly qaýymmen, aqyn-jazýshylarmen, ǵalymdarmen aqyldasyp, pikirlesip otyrýdyń mańyzy zor.
«Sol maqsatpen Senat janynan jańa dıalog alańyn quryp jatyrmyz. Onyń atyn «Ulttyq múdde» dep ataýdy usynyp otyrmyz. Qazir ártúrli pikirtalas alandary jeterlik ekeni belgili. Bizdiń jobanyń ereksheligi – depýtattar men zııaly qaýym ókilderin tarta otyryp, ulttyq múddemizge, ulttyq qundylyqtarǵa, ulttyń bolashaǵyna qatysty mańyzdy máselerdi talqylaý jáne osy baǵyttaǵy naqty is-sharalardy anyqtaý. Ári qaraı olardyń júzege asyrylýyna uıytqy bolý. Osyndaı maqsatpen osy dıalog alańyn uıymdastyryp otyrmyz», dep túsindirdi Máýlen Áshimbaev.