BAQYLAÝ – BAǴALAÝDYŃ BASTY TETIGI

Keshe Qazaqstan Respýblıkasy Prezıdenti Ákimshiligi Basshysynyń orynbasary Baýyrjan Baıbektiń tóraǵalyǵymen semınar-keńes bolyp ótti. Oǵan Prezıdent Ákimshiliginiń jáne Premer-Mınıstr Keńsesiniń jaýapty qyzmetkerleri, memlekettik organdar basshylary, birqatar mınıstrlikterdiń jaýapty hatshylary, oblys, Astana men Almaty qalalary,  ákimdikteriniń baqylaýyndaǵy tapsyrmalarǵa jaýapty apparat basshylary men bólim meńgerýshileri qatysty. Keńestiń basty taqyryby stra­tegııalyq josparlaý, memlekettik organdar qyzmetiniń tıimdiligin baǵalaý, Memleket basshysynyń aktileri men tapsyrmalarynyń oryn­dalýyn qalyptastyrý jáne baqylaý týraly Qazaqstan Respýb­lı­kasynyń Prezıdenti Jarlyq­ta­ryn iske asyrý sharalaryna ar­nal­dy. Memleket basshysy Qazaqstan halqyna arnaǵan bıylǵy Jol­daý­ynda elimizdiń 2020 jylǵa deıingi strategııalyq damý josparynyń negizgi baǵyttaryn aıqyndap ber­geni belgili. B.Baıbek osy rette mem­lekettik organdarǵa barsha qa­zaqstandyqtardyń ómir súrý deńgeıin arttyrý mindeti júktel­ge­nin erekshe atap ótti. Sońǵy ýa­qyt­tary Memleket basshysy atalǵan máselelerge oraı, ıaǵnı Strategııa­lyq josparlaýǵa, Prezıdent akti­le­ri men tapsyrmalarynyń oryn­da­lýyn baqylaýǵa jáne memle­ket­tik organdar jumysynyń tıimdi­ligin baǵalaýǵa qatysty birqatar Jarlyqtar jarııalady. Sondaı-aq, Elbasy oblys, oblystyq mańyzy bar qala, aýdan ákimderiniń reı­tın­gin ótkizýdi tapsyrǵan-dy. Munyń barlyǵy memlekettik apparat jumysynyń tıimdiligin arttyrýǵa baǵyttalyp otyr. Elimiz 2030 Strategııalyq jos­parynyń onjyldyq belesin artqa tastap, ótken jyly daǵdarystan aıtarlyqtaı tıimdilikpen shyǵa bildi. Qazir daǵdarystan keıingi damý kezeńi bastaldy. Jedelde­til­gen damý baǵdarlamasy bekitilip, jumys isteýde. Alaıda, atalǵan baǵdarlamany júzege asyrý úshin memlekettik apparattyń tıimdi de kúsh biriktirgen áreketi qajet. Ol úshin memlekettik josparlaýdyń birtutas júıesin kúsheıtý mindeti tur. Mundaı júıe burynǵy keńes­tik dáýirde bolǵany belgili. Ásirese, josparlaýdy óńirlerde kúsheıtý basty maqsatqa aınalyp otyr. Or­talyqta qabyldanǵan sheshimderdiń jergilikti jerlerde júzege asýy ma­ńyzdy. Alǵa qoıylǵan mindetterdiń jergilikti jerlerde belsendi sheshi­lýinen onyń tıimdiligi aıqyn kó­rin­bek. Bul oraıda jumystyń ná­tı­jeliligi baǵalaý arqyly anyqta­la­tyn bolady. Baǵalaýdyń alty túri anyqtalsa, ústimizdegi jyly Aqmo­la oblysynda, Eńbek jáne ha­lyq­ty áleýmettik qorǵaý mı­nıstrligi men Tabıǵı monopolııa­lardy ret­teý agenttiginde 3 qanat­qaqty ba­ǵalaý engizilmek. Kelesi jyly bar­lyq memlekettik organ­dar osyndaı baǵalaýǵa alyn­baq­shy. Mundaı tásil memlekettik organdar jumy­sy­nyń tıimdiligin arttyrýy tıis. Sonymen qatar, baǵalaý saralaý tetikterin berip, qandaı baǵdarla­malar men mindetterdiń qalaı oryn­dalyp jatqanynan habardar etedi dep kútilýde. Qazirgi kezde kóp­tegen aktiler men tapsyr­ma­larǵa revızııa júrgizilip, ústimizdegi jyldyń 1 shildesinen bastap Pre­zıdent tapsyrmalarynyń oryn­da­lýy­na tek saıası memlekettik qyz­metkerler jaýapty bolady dep bel­gilengen. Mundaı tapsyrmalardyń uzyn sany 400-den asady eken. Olardyń deni halyqtyń turmys jaǵdaıyn jaqsartýǵa baǵyttalǵan. Túptep kelgende, memlekettik organdar jumysyn júıeli baǵalaý baqylaýdyń mańyzdy bóligi bolyp tabylady. Bul jumysty Prezıdent Ákimshiligi men Premer-Mınıstr Keńsesiniń ókilderinen quralǵan sarapshylar komıssııasy úılestirip otyrady. Sondaı-aq, memlekettik organdar jumysyn baǵalaýǵa úki­met­tik emes uıymdar, táýelsiz sa­rap­shylar qatyssa, nátıjesi Mem­leket basshysynyń aldyna usyny­lyp,  BAQ-tarda jarııalaý da qarastyrylǵan. Asqar TURAPBAIULY.