Bıylǵy 18 tamyzda Ulttyq qaýipsizdik komıteti Shekara qyzmetiniń qurylǵanyna 30 jyl tolady. Osyǵan oraı, túrli taqyryptyq sharalar men baıqaýlardan bólek, shekarashylardyń erlikke toly isteri týraly kitap jazylyp, «Memlekettik shekara» degen ataýmen respýblıka jurtshylyǵyna jol tartty.
Jaqynda UQK Shekara qyzmetiniń án-bı ansambli óziniń shyǵarmashylyq saparyn elimizdiń shyǵystaǵy shekarasynan bastady. Atap aıtar bolsaq, Áskerı-patrıottyq qyzmeti basqarmasynyń podpolkovnık Q.Ánýarbek bastaǵan ónerpazdar toby UQK Shekara qyzmetiniń Almaty oblysy boıynsha departamentiniń Qarasaı, Raıymbek, Panfılov jáne Alakól aýdandary boıynsha shekara basqarmalarynyń ýchaskelerinde bolyp, shekara aımaǵyn ánmen árledi.
Aldymen, án-bı ansambli Jambyl aýdanynyń mádenıet úıinde Qarasaı aýdany boıynsha shekara basqarmasynyń «Qastek», «Jambyl», «Qarǵaly», «Qaskeleń» shekara bólimsheleriniń jeke quramdarymen birge jergilikti ónersúıer halyqpen kezdesti. Zal toly kórermen shekarashy ónerpazdar daıyndaǵan patrıottyq ánderdi tyńdap, kúmbirlegen kúılerge qulaq quryshtaryn qandyrdy.
- Bizdiń naýryz aıynyń basynan bastalǵan shyǵarmashylyq saparymyz Shekara qyzmetiniń 30 jyldyǵyna arnalady. Sondyqtan merekelik konsertti Otanymyzdyń shebin qorǵap júrgen shekarashylar ǵana emes, shekara óńiriniń halqy da tamashalaýǵa tıis. О́ıtkeni, óńirdiń qartynan bastap, mektep oqýshysyna deıin ózin shekarashy sanaıdy, deıdi podpolkovnık Qýanysh Ánýarbek.
Shyǵarmashylyq toptyń konserttik baǵdarlamasy atalǵan shekara basqarmasynyń «Saty», «Rabat» shekara bólimsheleri ornalasqan A.Núsipbekov eldi mekeniniń mádenıet úıinde jalǵasty. Ile Alataýynyń baıyrǵy turǵyndary da shekarashy ónerpazdardy qushaq jaıa qarsy alyp, ánshiler oryndaǵan «Shekaramyz berik bolsyn», «Bastaý», «Báıge», «Altyn besik», «Qazaǵym jasa», «О́ner joly» sekildi tamasha ándermen rýhanı sýsyndady.
Jyr dúldúli Jambyl babamyzdyń týǵan jerinen bastaý alyp, jer jánnaty Jetisýdyń Úsharal qalasyna deıin jalǵasqan shyǵarmashylyq sapar kezinde jergilikti jurtshylyq qazaq eliniń «Júz ánine» engen týyndylardy ǵana tyńdaýmen shektelgen joq. Elimizdiń kúshtik qurylymdary arasynda, halyqaralyq baıqaýlarda top jaryp júrgen UQK Shekara qyzmeti án-bı ansambliniń repertýarynan álem halyqtarynyń ánderi men bılerin de kóptep kezdestirýge bolady.
Ári qaraı, Narynqol, Shonjy aýyldarynyń mádenı oshaqtaryna at basyn tirep, aýdan jurtymen qaýyshqan shekarashylardy kelesi núkte – Jarkent qalasynyń halqy kútip otyrǵan-dy. Shekarashy ónerpazdar qalanyń mádenıet úıinde bolyp qana qoıǵan joq, Qorǵas aýylyna da arnaıy at basyn tiredi. Osylaısha, shekara aımaǵyn tamasha án-kúıge bólegen ansambl músheleri jolaı Tekeli qalasyna soǵyp, Alakól aýdanynyń ortalyǵynda úsharaldyqtarmen birge Ulystyń uly kúnin toılady.
UQK Shekara qyzmetiniń 30 jyldyǵy qarsańynda shekara óńiriniń halqymen bolǵan osynaý ulaǵatty kezdesý – shekarashylardyń el shebindegi kún men túnge jalǵasqan qyzmetin, Otan oǵlandarynyń erlik isterin ulyqtaý bolatyn.
Tamara DÁÝLETBAEVA,
jýrnalıst