14-16 sáýir aralyǵynda Nur-Sultandaǵy Ulttyq tennıs ortalyǵynda Bıllı Djın Kıngtiń kýbogy jolyndaǵy jarystyń irikteý kezeńinde Qazaqstan men Germanııa quramalary ózara sheberlik synasady. Qazirdiń ózinde atalǵan básekede qos komandanyń qandaı quramda óner kórsetetini belgili.
Kezinde áıelder arasyndaǵy bul jarys Federasııa kýbogy dep atalatyn. 2020 jyly oǵan AQSh-tyń áıgili tennısshisi, belgili qoǵam qaıratkeri Bıllı Djın Kıngtiń esimi berildi. Ol 1960-1983 jyldar aralyǵynda óner kórsetip, birer jyl boıy álemniń birinshi raketkasy degen mártebeli ataqqa ıe boldy. Alty ret Ýımbldondy utyp, US open týrnırinde bes márte top jardy. Aýstralııanyń ashyq birinshiliginde aldyna jan salmaı, Rolan Garrosta da dara shyqty. Jekelegen, juptyq jáne aralas juptar saıystaryn qosa alǵanda Kıng «Úlken dýlyǵa» sanatyndaǵy jarystarda 39 ret jeńimpaz atandy.
Statıstıkalyq málimetterge júginsek, atalǵan týrnırde eń kóp oljaǵa kenelgen AQSh quramasy ekenin ańǵaramyz. Amerıkalyqtar 18 márte bas júldeni oljalady. Chehııa tennısshileri 11 ret teńdessiz dep tanylsa, jeti jarysta Aýstralııa arýlary aldyna jan salmady. Sondaı-aq Ispanııa men Reseı – bes, Italııa – tórt, Fransııa – úsh, Germanııa – eki, Belgııa, Slovakııa jáne OAR bir-bir retten teńdessiz dep tanyldy.
Bizdiń irikteý týrnırindegi qarsylasymyz – Germanııa quramasy jarty ǵasyrdan asa ýaqyt osy jarysta óner kórsetýde. Olar 1987 jáne 1992 jyldary Bıllı Djın Kıng kýbogyn ıelendi. Sol dańqty komandanyń sapynda Shteffı Graf, Klaýdıa Kode-Kılsh, Anke Hýber, Barbara Rıttner syndy attary ańyzǵa aınalǵan tennısshilerdiń oınaǵanyn kózi qaraqty kórermender jaqsy biledi. Taǵy bes týrnırde nemister fınalǵa shyqqanymen, sheshýshi tusta qarsylastaryna ese jiberdi. Sońǵy ret olar 2014 jyly Pragada ótken jarystyń aqtyq synynda Chehııadan 1:3 esebimen utyldy.
Sáýir aıynyń bel ortasynda Nur-Sultanda ótetin básekede Germanııanyń namysyn Anjelıka Kerber, Andrea Petkovıch, Iýle Nımaıer, Anna-Lena Frıdzam jáne Laýra Zıgemýnd syndy oıynshylar qorǵaıdy. Bulardyń barlyǵynyń de esimi jankúıerlerge jaqsy tanys. Máselen, 34 jastaǵy Kerber kezinde álemniń birinshi raketkasy atansa, bul kúnderi WTA tiziminde 15-oryndy ıelenýde. 2016 jyly ol Aýstralııa men AQSh-tyń ashyq birinshilikterinde top jardy. Rıo Olımpıadasynda kúmis medaldy oljalady. 2018 jyly Ýımbldonda dara shyqty. Anjelıka 2014 jyly Germanııa quramasy sapynda dál osy jarystyń kúmis júldegeri atandy. Álemdik reıtıngte 62-orynda turǵan Petkovıchtiń de jasy 34-te. Tasy órge domalap turǵan kezinde ol Rolan Garrostyń jartylaı fınalyna deıin jetip, WTA jarystarynda jeti márte jeńimpaz atandy. 22 jastaǵy Nımaıer úzdikter tiziminde 111-oryndy enshileýde. Ol bolashaǵynan zor úmit kúttirip otyrǵan asa daryndy tennısshilerdiń biri. Frıdzam men Zıgemýnd ta túrli halyqaralyq dodalarda baq synap, úlken tájirıbe mektebinen ótken myqty oıynshylar.
Germanııaǵa qarsy kezdesýde Qazaqstan quramasy sapynda Elena Rybakına (jekelegen reıtıngte 20-orynda), Anna Danılına (juptyq reıtıngte 22-oryn), Iýlııa Pýtınseva (jekelegen reıtıngte 47-orynda), Zarına Dıas (jekelegen reıtıngte 110-orynda) jáne Jibek Qulambaeva (juptyq reıtıngte 297-orynda) kortqa shyǵady.