«Alaý» muz aıdynynda short-trekten Qazaqstan Respýblıkasynyń chempıonaty jalaýyn kóterdi. El chempıonatynyń ashylý saltanatyna Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Samat Erǵalıev qatysty, dep habarlaıdy Egemen.kz.
S.Erǵalıev chempıonattyń ashylýymen quttyqtap, qatysýshylarǵa sáttilik tiledi.
«Short-trek elimizde qarqyndy damyp kele jatqan sport túri. Buǵan aıqyn dálelderdiń biri – Beıjiń Olımpıadasyndaǵy short-trekten ulttyq quramanyń nátıjeleri. Atalǵan sport túrinde jastar arasynda da myqty sportshylar bar ekeni kóńil qýantady. Aldaǵy ýaqytta mınıstrlik tarapynan sportshylarymyzdyń sapaly daıyndyq jumystaryn uıymdastyryp, álemdik arenalarda joǵary nátıjeler kórsetýi úshin jan-jaqty jaǵdaı jasaımyz», dedi komıtet tóraǵasy.
Ulttyq quramanyń úzdik sportshylaryn anyqtaıtyn jarys 31 naýryzǵa deıin jalǵasady.