Eńbek jáne halyqty áleýmettik qorǵaý vıse-mınıstri Erjan Birjanov Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Memleket basshysynyń qazaqstandyqtardyń tabysyn arttyrý jáne jumyspen qamtýdy qamtamasyz etý jónindegi tapsyrmalaryn iske asyrý barysy týraly baıandady.
Búginde turǵyndardy jumyspen qamtý máselesi Úkimettiń birinshi kezektegi mindeti sanalady. Memleket basshysy Qasym-Jomart Toqaev osy maqsatta Eńbek jáne halyqty áleýmettik qorǵaý mınıstrliginiń aldyna birqatar aıqyn mindetterdi qoıǵan bolatyn.
– Bıyl Prezıdent «Jastar praktıkasy» jáne «Alǵashqy jumys orny» jobalaryna qatysý kezeńi men osy jobalarǵa qatysýshylardyń jalaqysyn arttyrý, sondaı-aq bıznes-ıdeıalardy damytý úshin grant mólsherin 400 AEK-ke deıin ulǵaıtýdy tapsyrdy. Sondaı-aq Prezıdenttiń óńirlerde jyl saıyn 10 myń turǵynǵa 100 turaqty jumys ornyn qurý tapsyrmasy bar. Halyq sanynyń ósýin eskere otyryp, negizinen 2025 jylǵa deıin 780 myń jumys orny ashylady. Sonymen qatar Ulttyq qoǵamdyq senim keńesiniń tórtinshi otyrysynda Memleket basshysy óńirlik jumyspen qamtý kartalary arqyly jumys oryndaryn qurý monıtorıngin qamtamasyz etýdi tapsyrdy. 2020 jyldan bastap ustazdardyń jalaqysy kezeń-kezeńmen arta bastady. 2021 jyldan beri medısınalyq jáne áleýmettik qyzmetkerlerdiń jalaqysy kóterildi. Nátıjesinde, 2023 jylǵa qaraı olardyń jalaqysy 2 esege artady. Al 2022 jylǵy 1 qańtardan bastap eń tómengi jalaqy mólsheri 41%-ǵa ósti. Osylaısha, 1 mln 650 myń adamnyń tabysy arta tústi, – dedi vıse-mınıstr.
Onyń aıtýynsha, Memleket basshysynyń tapsyrmalaryn iske asyrý sheńberinde 2022 jylǵy aqpanda atalǵan vedomstvo tıisti normatıvtik-quqyqtyq aktilerge ózgerister engizdi. Osylaısha, «Jastar praktıkasyna qatysý kezeńi 6 aıdan 12 aıǵa deıin, «Alǵashqy jumys orny» jobasy boıynsha 12-den 18 aıǵa deıin uzartyldy.
– Jastar praktıkasyna qatysýshylardyń jalaqysy 20%-ǵa, ıaǵnı 25-ten 30 AEK-ke deıin, «Alǵashqy jumys orny» jobasyna qatysýshylardyń jalaqysy 50%-ǵa, ıaǵnı 20-dan 30 AEK-ke deıin ósti. Ol 90 myń teńge kólemindegi qarajat. Bul memleket tarapynan bólinetin qarjy. Sonymen qatar jumys berýshi qosymsha tólem jasasa, bul kórsetkish 100 myń teńgeden asýy múmkin. Sondaı-aq jańa bıznes-ıdeıalardy iske asyrýǵa arnalǵan grant mólsheri 200-den 400 AEK-ke, ıaǵnı 1,2 mln teńgege deıin 2 esege ulǵaıdy, – dedi E.Birjanov.
2021 jylǵy qazanda Memleket basshysynyń tapsyrmasyna sáıkes jobalyq basqarý júıesin engize otyryp, «Eńbek» memlekettik baǵdarlamasy jańa Kásipkerlikti damytý jónindegi ulttyq joba retinde qaıta formattaldy. Joba boıynsha óńirlerde jańa jumys oryndary qurylyp, jyl saıyn 700 myń adamdy jumysqa járdemdesý sharalarymen tartý kózdeldi.
– Sonyń ishinde 36 myń adam kásiptik oqytýmen qamtylady. 50 myń adamǵa kásipkerlik bastamashylyqqa járdemdesý boıynsha qoldaý sharalary kórsetiledi. 97,6 myń adam sýbsıdııalanatyn jumys oryndaryna jumysqa ornalastyrylady. Bıylǵy 2 aıdyń qorytyndysy boıynsha 115,6 myń adam osy sharalarǵa tartyldy. Sonyń ishinde 31,6 myń adam turaqty jumys oryndaryna ornalastyryldy. 36,4 myń adam qoǵamdyq jumystarǵa tartyldy. Bul – memleket tarapynan qarjylandyrylatyn jumys. 8 myń adam áleýmettik oryndarǵa jumysqa tartyldy. 3,3 myń adam jastar praktıkasyna, al 326 adam «Alǵashqy jumys orny» jáne «Urpaqtar kelisimsharty» jobalary aıasynda jumysqa ornalastyryldy, – dedi spıker.
Eńbek mınıstrligi halyqtyń tabysyn 2025 jylǵa deıin arttyrý jónindegi baǵdarlama sheńberinde jańa jumys oryndaryn qurý, halyqty jumyspen qamtýǵa járdemdesý, eńbek resýrstarynyń daǵdylaryn jetildirý jáne jastardy kásiptik baǵdarlaý jumysyn qolǵa alyp keledi. Baǵdarlamanyń 38 is-sharasy vedomstvonyń qatysýymen iske asady. Sonyń 17-in mınıstrlik tikeleı júzege asyrady.
– Birinshi kezekte is-sharalar jumys oryndaryn qurýǵa jáne ózin ózi jumyspen qamtyǵan adamdardy kóleńkeden shyǵarýǵa baǵyttaldy. Búginde qyzmet kórsetý salasynda 900 myńǵa jýyq adam jumys isteıdi. Olardyń bir bóligi zańnan tys qyzmet kórsetedi. Iаǵnı olar kóbinese bir rettik qyzmet kórsetip, kóp jaǵdaıda tapsyrys berýshiden qorǵalmaıdy. Bul rette biz «Platformalyq jumyspen qamtý» atty baǵdarlamalyq ónimdi jasap shyǵardyq. Búginde bul baǵdarlama testileýden ótip jatyr. Bıyl engiziletin bolady. Bul mysaly, úı tazartý, qorǵaý, azyq-túlik jetkizý sııaqty qyzmet kórsetetin adamdarǵa osy qosymshada tirkelip, tez ári yńǵaıly tapsyrys tabýǵa múmkindik beredi. Qosymshada taraptardyń quqyqtary men mindetteri, oryndaýshynyń eńbek quqyqtaryn qorǵaý kózdeletin qysqartylǵan shart kózdeledi. Bul kóleńkedegi adamdarǵa kásipkerlik ortany qalypty deńgeıge shyǵarýǵa jáne aýdarýǵa múmkindik beredi. Osylaısha, olar ońaı tirkelip, salyq tóleı alady», dedi spıker.
Sondaı-aq 3-shi jáne 4-shi sanat boıynsha sheteldik jumys kúshin tartýǵa kvota 4,7 myń adamǵa qysqartylady. Bul sharalar halyqtyń jumyspen qamtylý deńgeıin arttyrýǵa ári ishki eńbek naryǵyn qorǵaýǵa múmkindik beredi.