«Báıterek» ulttyq basqarýshy holdınginiń delegasııasy Qytaıda issaparmen bolyp, osy eldiń ınvestorlarymen birqatar mańyzdy kelisimderge qol jetkizdi. Bul týraly Egemen.kz tilshisi habarlady.
Holdıngtiń basqarma tóraǵasy Qýandyq Bıshimbaev bastaǵan jumys toby Qytaıdyń memlekettik damý banki, QHR Eksporttyq-ımporttyq banki, Qytaıdyń Eksporttyq-nesıelik saqtandyrý korporasııasy (SINOSURE) syndy qarjy qurylymdarynyń ókilderimen kezdesti.
QHR Eksporttyq-ımporttyq banki prezıdenti Lı Rýogýmen Shymkent munaı óńdeý zaýytyn jańǵyrtý jáne qaıta qurylymdaý máselesi talqylandy. Bul jobaǵa qatysty memorandýmǵa Memleket basshysy Nursultan Nazarbaevtyń mamyr aıynda Qytaı Halyq Respýblıkasyna memlekettik sapary kezinde qol qoıylmaq. «Báıterek» holdınginiń delegasııasy sapar barysynda Lıaonın provınsııasynyń gýbernatory Chen Chjengao myrzamen jáne jergilikti iskerlik toptarmen kezdesti, sondaı-aq «Shenyang Yuanda Group» holdınginiń óndirisin aralady. Qazaqstan jaǵy bul kompanııamen lıft shyǵaratyn óndiris ashý máselesin qarastyrýda.
Holdıng delegasııasynyń issapary Elbasynyń Qytaı Halyq Respýblıkasyna memlekettik saparyna oraı aldyn ala uıymdastyryldy. Qytaı qarjy uıymdarynyń ókilderimen ótken kelissózder eki memleket kóshbasshylarynyń tabysty dıalogyna óz úlesin qosatynyna senimdimiz. «Báıterek» holdıngi jáne onyń enshiles uıymdarynyń Qytaıdyń jetekshi bankterimen yntymaqtastyǵy elimizdegi údemeli ındýstrııalyq-ınnovasııalyq damý jónindegi memlekettik baǵdarlamanyń josparlaryn iske asyrýdyń, shetel kapıtalyn tartyp, bıznesti júrgizýdiń jáne tehnologııalardyń qazirgi zaman úlgilerin qoldaný múmkindikterin keńeıtedi degen úmit bar.
Nurbaı Elmuratov.
Derekkóz: Egemen.kz.
Foto: «Báıterek» ulttyq basqarýshy holdıngi