Amanat-tyń Partııalyq baqylaý komıteti Energetıka mınıstrligine gazdandyrý baǵdarlamasyn pysyqtaýdy usyndy. Partııalyq baqylaý komıtetiniń otyrysynda óńirlerdi gazdandyrýǵa qatysty suraqtarmen qatar, ınternattardaǵy balalarǵa qolaıly jaǵdaı jasaý máselesi qaraldy.
Energetıka mınıstrliginiń málimetinshe, ótken jyly 146 jobany júzege asyrý úshin 51,3 mlrd teńge qarastyrylyp, sol jobalardyń 39-y paıdalanýǵa berilgen. Bıyl 38 jobany aıaqtaý úshin bıýdjetten 45,8 mlrd teńge mólsherinde qarajat kózdelgen.
Bul rette partııanyń saılaýaldy baǵdarlamasyn iske asyrý aıasynda 2025 jylǵa deıin Nur-Sultan, Qaraǵandy, Kókshetaý, О́skemen, Pavlodar, Petropavl jáne Semeı qalalaryn, sondaı-aq 900 myńnan asa halqy bar 246 aýyldy gazben qamtamasyz etý josparlanyp otyr.
«Saryarqa» magıstraldy gaz qubyry belgilengen merzimde paıdalanýǵa berildi. Alaıda turǵyn úılerdi gazdandyrý jumystaryn aıaqtaý merzimi únemi keıinge shegerilip keledi. Jelilerdi josparlaý jáne jobalaý kezeńinde de aıtarlyqtaı kemshilikterge jol berilgeni anyqtaldy. Sonyń saldarynan qazirdiń ózinde keıbir óńirlerde gaz qubyrlary qýatynyń tapshylyǵy bar. Gazben jabdyqtaý jelilerin salý jobalary 2019 jylǵy baǵany eskere otyryp ázirlengendikten ol túzetýdi qajet etedi. Bıyl iske asyrý úshin josparlanǵan jobalardy paıdalanýǵa berýdi keıinge qaldyrý jáne qarajat jetkiliksizdigi oryn alý qaýpi bar», dedi komıtet tóraǵasy, Májilis depýtaty Artýr Platonov.
Komıtet múshesi Mıras Shekenov Túrkistan oblysynyń Báıdibek aýdanynda qubyrlar tartylyp bitkenimen, 7 aýylǵa gaz júrgizilmegenin atap ótti. Shyǵys Qazaqstan oblysynyń Zaısan aýdanynda búginge deıin aýyl ishinde jelilerdi salýǵa qarjy bólinbegen. «Shymkentte «Asar 2» jáne «Altyn tóbe» aýdandaryn gazdandyrý jumystary tek esep berý úshin jasalǵan. Sebebi munda turǵyndarǵa gaz berilgeni týraly BAQ, áleýmettik jelilerde jarııa etip, keıin óshirip tastaǵan. Qazir olardyń gazdy qalypty paıdalanýǵa múmkindikteri joq», dedi M.Shekenov.
Jıynda Energetıka birinshi vıse-mınıstri Murat Júrebekov gaz salasyndaǵy jumystardyń qazirgi jáne aldaǵy jaǵdaıy jaıly habarlady. Máselen, eger buryn Qytaıǵa gaz jetkizýden túsken paıda QazaqGaz-dyń ishki naryqtaǵy shyǵyndaryn japsa, eksport kólemi azaıǵan kezde shyǵyn 60 mlrd teńge shamasynda dep boljanýda.
Túrkistan, Shyǵys Qazaqstan jáne Qaraǵandy oblystaryndaǵy mektep-ınternattardaǵy balalarǵa tıisti jaǵdaıdy qamtamasyz etý boıynsha júrgizilgen tekserý qorytyndysy týraly partııa janyndaǵy Otbasy jáne halyqty áleýmettik qorǵaý máseleleri jónindegi respýblıkalyq qoǵamdyq keńestiń tóraǵasy Dınara Zákıeva baıandady.
D.Zákıevanyń aıtýynsha, Túrkistan oblysynyń Saryaǵash aýdanyndaǵy S.Seıfýllın atyndaǵy №12 mektep-ınternaty apatty jaǵdaıda tur. Mektepke 70 jylǵa jýyq ýaqyt jóndeý júrgizilmegen. Internatta 61 bala bilim alǵanyna qaramastan, shtatta eki-aq tárbıeshi jumys isteıdi. Shymkenttegi estý qabileti tómen balalarǵa arnalǵan №2 mektep-ınternatyna shuǵyl túrde jańa ǵımarat salý kerek. Balqash kóliniń irgesindegi Shubartúbek aýylynda aýyzsý tapshylyǵynan jumysy toqtap turǵan jazǵy saýyqtyrý lageri ornalasqan. Al sýdy tushylandyratyn qurylǵyny satyp alý úshin 30 mln teńge qarajat qajet.
Qoǵamdyq keńestiń tóraǵasy bul másele ótken jyldyń qazan aıynda Partııalyq baqylaý komıtetiniń otyrysynda qaralǵanyn atap ótti. Sol kezde Bilim mınıstrligine, sondaı-aq jergilikti atqarýshy organdarǵa árbir ınternat boıynsha anyqtalǵan máselelerdi sheshýdiń naqty merzimderi men joldaryn qamtıtyn egjeı-tegjeı jospar ázirleý usynyldy.
Komıtet múshesi, Májilis depýtaty Álııa Ábsemetova aýlalardaǵy dárethanalar máselesin kóterdi. Bilim mınıstrliginiń málimetinshe, respýblıka boıynsha kóshe dárethanalary bar 167 mektep bolsa, bul kórsetkish budan áldeqaıda kóp bolýy múmkin. «Erekshe balalarǵa qatysty másele árqashanda ótkir. Mysaly Almaty oblysynyń Sarqan qalasynda aqyl-esi buzylǵan balalarǵa arnalǵan mektep-ınternat bar. Olar turatyn jerde eshqandaı jaǵdaı jasalmaǵan, oqý ǵımaraty joq, ashana apatty jaǵdaıda tur, al dárethana kóshede 10 mınýttyq jerde ornalasqan. 2020 jyly jylytylǵan dárethana salyndy, alaıda jaramsyzdyǵyna baılanysty jabylyp qaldy. Káriz júıesi durys emes. Ýákiletti organdardan máseleni jedel sheshý úshin sharalar qabyldaýdy suraımyn», dedi depýtat.
Partııanyń óńirlik fılıaldary men partııalyq baqylaý komıssııalaryna ınternat mekemelerinde anyqtalǵan qolaısyzdyqtardy joıý úshin jumys josparlaryn ázirleý, ony naqtylap, óńirlerde júzege asyrý jumystaryna keshendi tekserý júrgizý tapsyryldy. Tekserý qorytyndysy boıynsha zań buzýshylyqtar, olqylyqtarǵa jol bergen nemese formaldy qaraǵan jaǵdaılarda kináli partııa múshelerin, jergilikti ýákiletti memlekettik organdardyń jaýapty qyzmetkerlerin partııalyq jaýapkershilikke tartýǵa qatysty másele de sóz boldy.