Taıaýda Nur-Sultan qalasyndaǵy respýblıkalyq «Áziret Sultan» meshitinde ashylǵan sırek kitaptar men qoljazba eńbekter kórmesi óz jumysyn aıaqtady.
Qoljazbalar jáne sırek kitaptar ulttyq ortalyǵynyń qoldaýymen ótken kórme aıasynda arnaıy jasaqtalǵan ekspozısııaǵa 20-dan astam qoljazba eńbekter men qundy jádigerler qoıylyp, kópshilikke tanystyrý jumystary júıeli túrde júrgizilip turdy. Sondaı-aq jurtshylyq qyzyǵa tamashalaǵan atalǵan kórme sórelerine dinı qyzmetkerler jınaqtaǵan qasıetti Quran kitabynyń ártúrli nusqalary kórermen nazaryna usynyldy.
Munda Ál-Farabı babamyzdan bastap 850-ge jýyq ǵulamanyń ómirbaıany qamtylǵan «Ýafııat ál-Aıan» syndy qundy eńbekter, Islam dinine qatysty túrli baspa ónimderi, VII ǵasyrǵa tıesili qasıetti Quran kitabynyń kóshirmesi kórmege kelýshilerdiń nazaryn aýdardy.
Kórme barysynda Qoljazba jáne sırek kitaptar ulttyq ortalyǵynyń ǵylymı qyzmetkeri Almas Imanǵalıev pen «Áziret Sultan» meshitiniń naıb ımamy Ádilhan Imanáliuly kúndelikti kelýshilerge kórme jumystaryn tanystyryp, sırek eńbekter boıynsha maǵlumat berip otyrdy.