Senator Lázzat Qıynov bastaǵan bir top halyq qalaýlysy Qazaqstan Respýblıkasy Premer-Mınıstriniń atyna depýtattyq saýal joldady. Onda bylaı delingen:
«Elbasymyz N.Á.Nazarbaev Jalpyǵa Ortaq Eńbek Qoǵamyn qurý mindetin alǵa qoıyp otyrǵan qazirgi kezeńde eńbek adamynyń qadir-qasıetin arttyrý, olardyń arasynan júzden júırik, myńnan tulpar shyqqandardy ardaqtaý ári mańyzdy, ári qajetti.
Memleketimizdiń tarıhynda aty qandaı qurmetteýge de laıyqty tulǵalardyń biri – Safı О́tebaev. Toqsannyń segizine kelip ómirden ótken bul asyl adam jaıynda tanymal jýrnalıst Saýytbek Abdrahmanov «Egemen Qazaqstan» gazetinde 2008 jylǵy 4 sáýirde jarııalanǵan «Munaıata» atty maqalasynda: «Jıyrmasynshy ǵasyrda bizde halyq sharýashylyǵynyń úsh salasynda úsh tulǵa erekshe jarqyrap kórindi: eginshilikte – Ybyraı Jaqaev, malshylyqta – Jazylbek Qýanyshbaev, ónerkásipte – Safı О́tebaev» dep jazdy.
Bul sózdiń eshqandaı artyqtyǵy joq. Safı О́tebaev týraly Qazaqstannyń Eńbek Eri Ábish Kekilbaev: «Qııan túkpir Mańǵystaýda qalǵan balǵyn bala kezimizde esimin eń kóp estigen adamym edi. Ol maǵan ushqysh Chkalovtaı, polıarshy Papanındeı, kombat Baýyrjan Momyshulyndaı, geolog Qanysh Sátbaevtaı – Arman arhıpelagynyń aqıyq turǵynyndaı bolyp elesteıtin. О́ıtkeni, ol qazaq jerinen taıaýda ǵana tabylyp, nápaqasy qazaq aýzyna endi-endi tıe bastaǵan eń jańa yrzyq – ulttyq munaı ónerkásibiniń izashary, kóshbastary edi» degen bolatyn.
1931 jyly Baký munaı ınstıtýtyna oqýǵa túsip, ony úzdik bitirip, qazaqtan shyqqan tuńǵysh kásibı maman munaıshy atanǵan Safı aǵa Qazaqstan ónerkásibinde óshpes izin qaldyrdy. Jas kúninde Embi, Dossor, Maqat ken oryndaryn ıgergen, Mańǵystaý munaıyn óndirýdi alǵash bastaǵan Safı О́tebaev 1957-1962 jyldary Gýrev oblystyq halyq sharýashylyǵy keńesiniń tóraǵasy, 1962-1965 jyldary quramyna qazirgi tórt oblys – Atyraý, Mańǵystaý, Batys Qazaqstan, Aqtóbe oblystary kirgen Batys Qazaqstan ólkelik halyq sharýashylyǵy keńesiniń tóraǵasy, keıinnen «Qazaqstanmunaı» birlestiginiń basshysy bolǵan jyldarynda el ekonomıkasyn órkendetýge, ásirese, munaı baılyǵyn ıgerý jolynda eresen eńbek etti. Safı О́tebaevtyń tikeleı qol astynda jumys istegen, tárbıesin kórgen azamattardyń arasynda Bólekbaı Saǵynǵalıev, Rahmet О́tesinov, Salamat Muqashev, Maqash Balǵynbaev, Násipqalı Marabaev sııaqty elimizge belgili tulǵalar kóp.
El aldyndaǵy eńbegi joǵary baǵalanyp, «Qurmet Belgisi» ordenin, «Otan» ordenin, I dárejeli «Barys» ordenin, Lenın ordenin, Oktıabr Revolıýsııasy ordenin, eki márte Eńbek Qyzyl Tý ordenin alǵan, kózi tirisinde-aq «Qazaq munaıynyń atasy» atanǵan ardaqty tulǵanyń, eńbekqorlyqtyń, jaýaptylyqtyń, biliktiliktiń, kisiliktiń, kishiliktiń, tazalyqtyń úırenerlik úzdik úlgisine aınalǵan adamnyń esimin el esinde máńgi qaldyrý jón ekendigi talassyz. Atap aıtqanda, Atyraý munaı-gaz ınstıtýtyna ulttyq ónerkásip kadrlaryn daıyndaý isine ólsheýsiz úles qosqan Safı О́tebaevtyń esimin berý qaı jaǵynan qaraǵanda da oryndy bolady dep oılaımyz. Úkimet basshysy tarapynan tıisti tapsyrma berilgen jaǵdaıda bizdiń bul usynysymyzdy Atyraý oblystyq ákimdigi, «QazMunaıGaz» Ulttyq kompanııasy» aksıonerlik qoǵamy, Bilim jáne ǵylym mınıstrligi, Onomastıkalyq komıssııa qoldaıdy dep senemiz».