Shyǵys Qazaqstan oblysyndaǵy Rıdder qalasynda «Qazsınk» kompanııasymen enshiles «Altyn Tau-Vostok» JShS-ine qarasty jer asty kenishteri biriniń beti opyrylyp túsip ketti. Bul týraly Egemen.kz tilshisi habarlady.
Sáýirdiń 4-i kúni saǵat 14:40-ta Rıdder shaharynyń ortalyǵynan úsh shaqyrym qashyqtyqta jer asty kenishiniń opyrylyp qulap ketýi saldarynan munda tereńdigi – 30, dıametri 70 metrdi quraıtyn úlken qazanshuńqyr paıda boldy. Osynyń saldarynan Býrabaı kóshesindegi №5 jeke úı atalǵan qazanshuńqyrǵa túsip ketken. Bir jaqsysy, úsh adam úıden der ýaqytynda shyǵyp úlgergen.
Rıdder-Sokolnyı kenishinde oryn alǵan tótenshe jaǵdaıǵa baılanysty jumys toqtatylyp, 480 kenshi jer betine shyǵaryldy. Abyroı bolǵanda, oqıǵa ornynda qaıtys bolǵandar men zardap shekkender joq. Degenmen, 500 metr radıýsta ornalasqan úılerdiń barlyǵy qorshaýǵa alynyp, 173 turǵyn kóshirildi. Onyń ishinde 60 adam «Qazsınk» JShS emhanasyna jatqyzylyp, qalǵany «Sınegore» demalys bazasyna ornalastyryldy. Olarǵa ystyq tamaq, medısınalyq kezekshilik jáne psıhologııalyq kómek berý jumystarymen atalǵan kásiporyn shuǵyldanyp jatyr.
Oblystyq tótenshe jaǵdaılar jónindegi departament ókilderiniń málimeti boıynsha, qazanshuńqyr erneýiniń dıametri sońǵy saǵattarda taǵy 5 metrge deıin keńeıgen. Oqıǵa ornynda taýda qutqarýshylar áskerı jasaǵy, qalalyq ishki ister basqarmasy, qalalyq sý arnasy, jylý-elektr ortalyǵy jáne taǵy basqa qyzmet ókilderi jumys isteýde. Atalǵan shahtanyń ıesi sanalatyn «Qazsınk» kásipornynyń basshylyǵy turǵyndardyń barlyq shyǵyndaryn kóterip alýǵa, kelesi aptada olarǵa ótemaqy tóleýge ýáde berdi.
Búgin oblystyq tótenshe jaǵdaılar departamentiniń baspasóz qyzmeti úıdiń qıraýy men alyp qazanshuńqyrdyń paıda bolýyna ken kameralarynyń birindegi shatyrdyń qulaýy sebep bolǵanyn jetkizdi.
Oqıǵa ornynda oblystyq prokýratýra qyzmetkerleri tekserý jumystaryn júrgizýde. О́nerkásiptik qalaǵa jatatyn Rıdderdegi jaǵdaıdy oblys basshylary baqylaýǵa alyp, jergilikti halyqqa qajetti kómekpen qamtamasyz etý jumystaryn jalǵastyrýda. Oqıǵa ornynda oblystyń jedel shtaby qurylyp, oblys ákiminiń orynbasary Nurymbet Saqtaǵanov tabıǵı apattyń saldaryn joıý jáne ári qaraıǵy is-áreket josparyn anyqtaý maqsatynda jedel jıyn ótkizdi. Jer betiniń taǵy da opyrylyp túsýinen saqtaný sharalary qolǵa alyndy.
Aıta keteıik, sońǵy kúnderi óńirdiń tótenshe jaǵdaı qyzmetkerlerine ońaı soqpaı tur. Osydan eki kún buryn Jarma aýdanynda bir táýlik ishinde 10 myń gektar aýmaqqa jaıylǵan órt sóndirilgen bolatyn. Birlik aýyldyq okrýgynda aýyzdyqtalǵan órtti sóndirý jumystaryna 126 órt sóndirý qyzmetkeri, 17 tehnıka, jergilikti 60 turǵyn, tipti «Temir joly» mekemesiniń órt sóndirý poıyzy da qatysty.
Dýman Anash.
Shyǵys Qazaqstan oblysy.