Búgin, 5 sáýir kúni Búkilálemdik boks serııasy (WSB) 2013-2014 jylǵy maýsymynyń ekinshi shırek fınaldyq kezdesýinde Germanııanyń Team Germany komandasyn 5:0 etip tize búktirgen Astana arlans jamaǵaty jartylaı fınalǵa joldama aldy. Bul týraly Egemen.kz habarlady.
Qazaqstandyq bylǵary qolǵap sheberleri budan buryn alman jerinde ótken birinshi matchta 3:2 esebimen utyp qaıtqan edi. Syrt alańda osyndaı basymdyq kórsetken jerlesterimiz óz úıiniń tórinde tipti qatty shaıqasty. Ondaǵy jeńisti joldy 52 kıloǵa deıingi salmaqtaǵy Mıras Jaqypov bastap berdi. Ol qarsylas komanda sapyndaǵy belgili sheber Ronnı Beblıkti talassyz utty – 3:0 (50:45, 50:45, 50:45). Kelesi salmaqtaǵy (60 kg) Samat Báshenov Artýr Brıldi 2:1 (50:45, 47:48, 50:45) qaıtardy. Budan soń 69 kılodaǵy Meıirim Nursultanov Vıacheslav Kerberden 3:0(50:45, 50:45, 49:46) degen eseppen basym tústi. Bul jeńis astanalyqtardyń jartylaı fınalǵa shyqqanyn aıǵaqtady.
Biraq bizdiń jigitter budan keıin de bosańsyǵan joq. Aldymen 81 kılodaǵy horvat legıoneri Hrvoe Sep men Serj Mıshel arasyndaǵy aıqasta 3:0 (50:45, 50:45, 50:45) degen esep tirkeldi. Eń sońynan 91 kıloǵa deıingi salmaqtyń sańlaqtary kúsh synasty. Onda qazaqstandyq Rýslan Myrsataev nemis Erık Pfaıferdi 2:1 (48:47, 49:46, 46:49) esebimen utty. Sóıtip, bes boksshymyz da óz mereılerin ústem etti.
Damır Qojamqul.
Derekkóz: Egemen.kz.
Foto: Vesti.kz.