8 cáýir – Gennadıı Golovkınniń týǵan kúni. Búgin qazaqstandyq kásipqoı boksshy Gennadıı Golovkın 40 jasqa toldy. Ol týǵan kúnin osy joly Tokıoda toılap jatyr, dep habarlaıdy Egemen.kz.
Memleket basshysy Qasym-Jomart Toqaev kásipqoı boksshy, álem chempıony Gennadıı Golovkındi týǵan kúnimen quttyqtap, jedelhat joldady.
«Jastarymyzǵa úlgi boldyńyz. Sizdiń otandyq bokstyń damýyna úlken úles qosa beretinińizge senimdimin», dep jazylǵan Prezıdenttiń quttyqtaýynda.
Al Gennadıı Golovkın óziniń Twetter-degi paraqshasynda Memleket basshysyna alǵysyn bildirdi.
«Qasym-Jomart Kemeluly, jyly lebizińiz ben iltıpatyńyzǵa kóp raqmet. Elimizdi álemge tanytý – men úshin úlken mártebe. Qoldaýyńyz úshin sizge jáne búkil Qazaqstanǵa raqmet!», dep jazdy Gennadıı Twetter-degi paraqshasynda.