El astanalary Nur-Sultan men Stokgolm 4 myń shaqyrymnan astam qashyqtyqta ornalasqanyna qaramastan, eki memleket arasyndaǵy qarym-qatynas dostyq pen ózara tıimdi yntymaqtastyqqa quryldy.
Osydan 30 jyl buryn, 1992 jyly sáýirde Qazaqstan Respýblıkasy men Shvesııa Koroldigi resmı túrde dıplomatııalyq qarym-qatynas ornatty. Ataýly kúnge oraı eki eldiń syrtqy saıası vedomstvolarynyń basshylary Muhtar Tileýberdi men Ann Lınde quttyqtaý hattarymen almasty. Qazaqstan mınıstri óz hatynda qorshaǵan ortany qorǵaý, aýyl sharýashylyǵy, kólik jáne logıstıka salasyndaǵy yntymaqtastyqtyń joǵary áleýetin atap ótip, áriptesin mereıli kúnmen quttyqtady. О́z kezeginde, shved mınıstri eki el arasyndaǵy dostyq pen yntymaqtastyq úshin, onyń ishinde Shvesııanyń 2021 jylǵy EQYU tóraǵalyǵy kezindegi qoldaýǵa zor rızashylyǵyn bildirdi.
Shvesııa – Qazaqstannyń Eýropalyq odaqtaǵy mańyzdy saıası seriktesi. Qazaqstan Prezıdentiniń 2004 jylǵy Shvesııaǵa jasaǵan alǵashqy resmı saparynan beri eki el túrli deńgeıde ondaǵan sapar jasap, kóptegen birlesken is-shara ótkizdi.
Bul turǵyda parlamentaralyq yntymaqtastyqty damytýǵa erekshe kóńil bólindi. Byltyr mamyr aıynda Qazaqstan Parlamentiniń Májilisi men Senatynyń depýtattary Shvesııa Parlamentiniń Ortalyq Azııa elderimen dostyq qaýymdastyǵy ókilderimen alǵash ret onlaın kezdesý ótkizdi.
Eki eldiń ózekti halyqaralyq máseleler boıynsha ustanymdary uqsas, BUU, EQYU jáne basqa da halyqaralyq qurylymdar sheńberinde ózara tyǵyz baılanys ornatqan. 2021 jyly Shvesııanyń Eýropadaǵy qaýipsizdik jáne yntymaqtastyq uıymyna tóraǵalyǵy kezinde Qazaqstan men Shvesııanyń syrtqy saıası vedomstvolarynyń basshylary Nur-Sultan, Madrıd jáne Stokgolm qalalarynda demokratııalyq ózgeristerdi odan ári damytý, adam quqyqtaryn saqtaý jáne «Stokgolm bastamasy» aıasynda ıadrolyq qaýipsizdikti qamtamasyz etý máseleleri boıynsha birqatar kelissózder júrgizdi.
Shved bıznesi Qazaqstanmen ınvestısııalyq jáne saýda-ekonomıkalyq yntymaqtastyqty keńeıtýge erekshe qyzyǵýshylyq tanytady. Pandemııanyń saldaryna qaramastan, ózara taýar aınalymy ósti. 2021 jyldyń qorytyndysy boıynsha Qazaqstan men Shvesııa arasyndaǵy taýar aınalymy 231,3 mln dollar boldy (eksport – 59 mln, ımport – 172,3 mln), bul 2020 jylmen salystyrǵanda 18% joǵary (191,3 mln dollar). Shvesııadan Qazaqstanǵa salynǵan tikeleı ınvestısııalar kólemi de ósip keledi. Resmı statıstıka boıynsha 2005-2021 jyldary Qazaqstan ekonomıkasyna 450 mln dollar kóleminde ınvestısııa quıylǵan.
Búginde Qazaqstan naryǵynda 50-den astam shved kompanııasy jumys isteıdi, olardyń ishinde álemge tanymal Ericsson, Volvo, Scania, Atlas Copco, Electrolux, Oriflame jáne H&M brendteri bar. Mańǵystaý oblysynda jasyl sýtegi óndirisi boıynsha Svevind nemis-shved konserni iri ınvestısııalyq jobany júzege asyryp jatyr.
Eki el sondaı-aq mádenı-gýmanıtarlyq salada yntymaqtastyqty damytýdy jalǵastyrdy. Shvesııanyń bilim berý júıesi álemde joǵary sapasymen tanymal, al Qazaqstannyń joǵary oqý oryndary, ásirese tehnıkalyq mamandyqtar boıynsha yntymaqtastyqty keńeıtýge múddeli. Osy ýaqyt aralyǵynda Shvesııada «Bolashaq» halyqaralyq stıpendııasy boıynsha 130-dan astam Qazaqstan stýdenti bilim aldy.
Úsh onjyldyqtyń qorytyndysy kórsetkendeı, Qazaqstan men Shvesııa birqatar baǵyt boıynsha tabysty baılanys ornatyp úlgergen jáne osy yntymaqtastyqty odan ári nyǵaıtýǵa daıyn.