Nesin aıtasyz, alash balasy úshin zor qýanysh – alash ardaqtylary Abaı men Qonaev rýhy qaıta jańǵyryp, aq túıeniń qarny jaryldy! Sondaı-aq Ulystyń uly kúni qarsańynda qasıetti Ulytaý ataýy asqaqtap, birneshe oblys ashyldy! Qazaq jurtynyń óńi shyraılanyp qaldy. Aıbarlanyp qaldyq! Prezıdentimiz el kókeıindegilerdi dóp basqany qandaı ǵanıbet deseńizshi.
Joldaýdyń turpaty bólek boldy. Qańtar oqıǵasynyń jaı-japsaryn taǵy bir tápsirlep berdi. Aýdara qarap, aqtara tekseriletinin taǵy bir túıip aıtty.
Prezıdent qoǵamdaǵy júıeniń seńin buzdy. Jyly aǵystyń arnasyn ashty. Endigi jerde saılaýǵa kúndelikti qasymyzda júrgen qarapaıym zamandastarymyz belsene qatysyp, tańdaý jasaıtyn kún týmaq. Eldiń bolashaǵy úshin ter tókkisi keletinder jańa partııa quramyn dese, kedergi joıylyp, jol ashyldy. Oblys jáne respýblıkalyq mańyzy bar qalalardyń máslıhattaryn aralas júıe boıynsha saılaıdy.
Memleket basshysy bılik partııasynan ketip, prezıdentke shamadan artyq ókilet berýden bas tartyp, ákimder jetekshi partııa fılıaldaryn basqarýdy toqtatý kerek dep ádildik týyn bıik kóterdi. Nesine jasyraıyq, burynǵy jetekshi partııany ákimder basqarǵasyn, aıdarynan jel esti. Endi aty da, zaty da ózgerdi. Damýdyń dańǵyl joly osyndaıdan bastalsa kerek-ti.
Joldaýda El tutqasynyń: «Buqaralyq aqparat quraldary básekege qabiletti jáne erkin bolýy kerek. Bul qaǵıdat qazir kez kelgen órkenıetti el úshin aıryqsha mańyzdy», – degeni óte oryndy boldy. Ásirese BAQ týraly zańdy qaıta qaraý týraly atap kórsetkeni jaǵymdy jańalyq! Sebebi bul zań eskirdi. Arzannyń sorpasy tatymaıtyn kúıge jetti. Ýaqyt talabyna saı emes.
Júrekten shyqpasa, júrekke jetpeıdi degendeı, Prezıdent Joldaýynda jan dúnıeńizge qozǵaý salatyn júrekjardy joldar jetkilikti. Aıtalyq: «Men azamattarymyzdyń erteń emes, búgin baqytty ómir súrgenin qalaımyn. Eń bastysy – elimizdiń egemendigi. Shyn máninde, biz úshin Qazaqstannyń Táýelsizdigi bárinen qymbat. Osy turaqsyz, qubylmaly álemde Qazaqstanymyz bizden basqa eshkimge kerek emes. Sondyqtan maǵan elimniń amandyǵy men jerimniń tutastyǵynan asqan eshbir qundylyq joq», degenin tolqymaı qabyldaý múmkin be?! Bul ár alash perzenti úshin taǵdyrsheshti ataly sóz ǵoı! Sebebi túsinikti. Tórtkil dúnıe daǵdaryp, tolqý ústinde. Almaǵaıyp kezeńniń sońy nemen bitetini belgisiz. Endeshe árkim óz Otanynda, óz jerinde bos sózden iske kóship, jumyla kirisý mindet. Muny árkim ózinen bastaý kerek. Osyny seziný bir basqa da, soǵan saı is-áreket jasaý bir basqa. Bizge sońǵysy jetpeı jatyr.
Prezıdentimiz: «Bizge eshkim syrttan kelip, eshteńe jasap bermeıtini anyq, bári óz qolymyzda» degenin esten shyǵarmaǵanymyz lazym.
Januzaq AIаZBEKOV,
Halyqaralyq «Alash» ádebı syılyǵynyń laýreaty,
Qazaqstan Jazýshylar odaǵy Qostanaı oblystyq fılıalynyń dırektory