Qarýly Kúshterdiń Ulttyq áskerı-patrıottyq ortalyǵynda qazaq ulynyń ǵaryshty baǵyndyrǵanyna 31 jyl tolýyna oraı tuńǵysh ǵaryshker, ushqysh, Halyq qaharmany Toqtar Áýbákirovtiń qatysýymen «Kitapqa jazylmaǵan tarıh: Ǵaryshqa jol» atty erlik sabaǵy ótti.
Nur-Sultan qalasy ákimdigi jáne Ulttyq áskerı-patrıottyq ortalyǵynyń qoldaýymen, «Jas sarbaz» jasóspirimder áskerı-patrıottyq qozǵalysynyń elordalyq fılıalynyń uıymdastyrýymen ótken is-sharaǵa Qorǵanys mınıstrliginiń ókilderi, generaldar, aýdan ákimderi jáne jas sarbazdar qatysty.
Kezdesý barysynda Toqtar Áýbákirov ǵarysh álemine qatysty derektermen bólisip, ǵarysh álemin baǵyndyrǵan sátindegi esten ketpes estelikterin aıtyp berdi. Sondaı-aq ol ǵıbratqa toly ǵumyrynda atqarǵan eleýli jumystary týraly tebirene áńgimeledi. Halyq qaharmanynyń qyzyqty áńgimeleri is-sharaǵa qatysqan jastardy úlken áserge bóledi. Keıinnen Toqtar Áýbákirov jas sarbazdarǵa qoltańba berip, arnaıy estelik syılyqtaryn tabystady.
Kezdesý barysynda Toqtar Áýbákirovke «Jas sarbaz» qozǵalysynyń tárbıelenýshileri kókeılerinde júrgen saýaldaryn qoıdy. Halyq qaharmany jasóspirimdermen emen-jarqyn áńgimelesip, ǵarysh álemine qatysty oılaryn ortaǵa saldy.
«Biz bul is-sharany jasópirimder qazaqtyń daraboz tulǵasynyń taǵylymǵa toly ómir jolymen tanyssyn degen maqsatta uıymdastyrdyq. Jastar jaǵy el maqtaǵan tulǵalardyń erlikke toly eńbegin jadynan shyǵarmaýy kerek. Halyq qaharmany Toqtar Áýbákirov aǵamyzdyń kitapqa jazylmaǵan jeke tarıhyn óz sózimen shynaıy jetkizgeni jınalǵandar úshin úlken olja boldy», dedi «Jas sarbaz» jasóspirimder áskerı-patrıottyq qozǵalysy Nur-Sultan qalalyq fılıalynyń tóraǵasy Ashat Nalshybek kezdesýde sóılegen sózinde.
Kezdesý sońynda qonaqtar Qarýly Kúshterdiń Ulttyq áskerı mýzeıinde uıymdastyrylǵan «Ǵaryshqa jol» kórmesiniń ashylý saltanatyna qatysty.