Ishki ister mınıstrliginde ótken alqa otyrysynda vedomstvodaǵy bıýrokratııany júıeli túrde joıý, aqparattandyrý jáne ońtaılandyrý máseleleri keńinen sóz boldy.
Jıynda baıandama jasap, ishki ister organdarynyń 1-toqsandaǵy jumys qorytyndysymen tanystyrǵan Ishki ister mınıstriniń orynbasarlary qylmys deńgeıiniń tómendegenin aıtty. Baıandamashylardyń málimetinshe, elde qylmys sany 7,3 paıyzǵa azaıǵan. Alaıda Ishki ister mınıstri Marat Ahmetjanov statıstıkaǵa súıenbeýge, eldegi jedel jaǵdaıdy naqty saýyqtyrý úshin jumys isteýge shaqyrdy.
Qazirgi tańda IIM-de Big Data quraldaryn paıdalaný arqyly aqparattyq júıe ázirlenýde. Bul júıe krımınogendik ahýaldyń kúndelikti monıtorıngin júzege asyrýǵa, ony taldap, eń bastysy, barlyq prosesterdi jedel ári tıimdi basqarýǵa múmkindik beredi. «Aqparatty jınaý jáne óńdeý avtomattandyrylady, shekten tys bıýrokratızm joıylady, ákimshilik jáne sotqa deıingi is júrgizý ońtaılandyrylady», dep atap ótti mınıstr.
Mınıstr aprobasııalanǵan júıe Shymkent qalasynda jol qozǵalysy erejelerin buzýshylardyń TOP-100-in avtomatty túrde qalaı qalyptastyrǵanyn mysalǵa keltirdi. Máselen, jergilikti júrgizýshilerdiń biri jarty jyl ishinde jyldamdyq rejimin 178 ret buzyp, tóleıtin aıyppul kólemi 4,5 mln teńgege jetken. Jalpy, jyl basynan beri jol erejesin buzǵan shymkenttikterge 2,2 mlrd teńgege aıyppul salynǵan.
Taldaý jumystary elimizdegi árbir úshinshi jol erejesin buzý deregi Shymkent tas joldarynda tirkeletinin kórsetip bergen. Megapolıstiń júrgizýshileri jol qozǵalysy erejelerin ashyq túrde elemeıdi. Sonyń saldarynan úsh aıdyń ishinde jol-kólik oqıǵalarynan 9 adam qaza bolǵan. Bul san basqa óńirlermen salystyrǵanda eń joǵary kórsetkish bolyp tabylady.
Osyǵan baılanysty IIM basshysy Shymkent qalasy Polısııa departamentiniń basshylyǵyna tıisti sharalar qabyldap, osy baǵytta naqty jumystar júrgizýdi tapsyrdy. Budan bólek mınıstr departament basshylaryna avtomatty taldaý derekterin eskere otyryp, joldarda tártip ornatýdy jáne júrgizýshilerdiń mádenıetin arttyrýdy tapsyrdy.
Sonymen qatar vedomstvo basshysy sybaılas jemqorlyqqa qarsy qyzmetpen birlesip, sybaılas jemqorlyq kórinisterine jol bermeý boıynsha sharalar qabyldaýdy jáne jazanyń bultartpastyǵyn qamtamasyz etýdi tapsyrdy.
Alqa otyrysynda quqyq buzýshylyqtardyń jáne jol-kólik oqıǵalarynyń aldyn alýǵa múmkindik beretin «Qorǵaý» arnaıy qosymshasy tanystyryldy. Qosymsha polısııa qyzmetkerleriniń jol qozǵalysy erejelerin qasaqana buzǵandarmen jumys isteýi úshin ázirlengen.
Mınıstr Marat Ahmetjanov aýyl turǵyndary úshin birden-bir tabys kózi bolyp tabylatyn mal urlyǵy máselesine de jeke toqtalyp, Álıhan Bókeıhannyń «Qazaqtyń keń dalasy maldy asyraıdy, al mal eldi asyraıdy» degen sózin qaperge saldy. Jıynda vedomstvo basshysy Qyzylorda oblysynyń tártip saqshylaryn synǵa alyp, polısııanyń áreketsizdigi saldarynan mal urylarynyń bostandyqta erkin júrgenin jetkizdi. Jyl basynan beri Syr óńirinde 49 mal urlyǵy tirkelse, urlanǵan 178 bastyń jartysy ǵana ıelerine qaıtarylǵan.
Mınıstr jergilikti atqarýshy organdarmen úılesimdi is-qımyl jasaý, mal jaıý erejeleriniń saqtalýyn, ásirese jıi urlanatyn ıesiz júrgen maldardy qaraý, jaıylymdardy qadaǵalaýdy uıymdastyrý qajettigin atap ótti. Salany bıýrokratııasyzdandyrý, aqparattandyrý jáne ońtaılandyrý máseleleri IIM júıesin jetildirý jáne qylmystyń jasalý jáne ósý sebepterin anyqtaý arqyly júrgizilmek.
«Polıseıler qaǵazdaǵy esep úshin emes, adamdar úshin jumys isteýi kerek. Polısııa departamentteriniń basshylaryna artyq esep berýdi toqtatyp, keńester sanyn azaıtýdy, qyzmetkerlerge qoıylǵan mindetterdi tıimdi oryndaýǵa yqpal etetin ońtaıly jaǵdaılar jasaýdy tapsyramyn. Polıseıler quqyq buzýshylyqty anyqtap qana qoımaı, tıisti qyzmetterden suraý jasaýy kerek, bul – ortaq jaýapkershilik», dedi IIM basshysy.
Keńeıtilgen alqa májilisinde Memleket basshysynyń balalardy qylmystyq qolsuǵýshylyqtan qorǵaýdyń tıimdiligin arttyrý, ınternet alaıaqtyq pen esirtki qylmysyna qarsy kúresti kúsheıtý, kóshi-qon júıesin baqylaýǵa alý týraly tapsyrmalarynyń júzege asyrylý barysy qaraldy.
Jeke quram arasyndaǵy sybaılas jemqorlyqty joıý, kadr saıasatyn jetildirý máseleleri de talqylandy. Mınıstr eń bastysy qaǵazdaǵy kórsetkishke emes, halyq ıgiligi úshin eńbek etýdi qaperden shyǵarmaý qajettigin eskertti.