Qazaqstanda kóktemgi áskerge shaqyrý naýqany bolyp jatyr. Azamattardy merzimdi áskerı qyzmetke shaqyrý 1 naýryzdan 30 maýsymǵa deıin jalǵasady, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Vedomstvonyń málimetinshe, 18-27 jas aralyǵynda azamattarǵa áskerge shaqyrý boıynsha arnaıy shaqyrtý qaǵazy jáne sms-habarlamalar jiberiledi. Shaqyrtýdy alǵan boıda olar medısınalyq komıssııadan ótýge mindetti.
«Eger áskerge shaqyrylýshy birneshe ret habarlaǵannan keıin jınaý pýnktine kelmese, onda jergilikti áskerı basqarý organdarynyń qyzmetkerleri polısııa qyzmetkerlerimen birlesip, jaltarýshynyń turatyn jáne jumys isteıtin jerine barady», dep jazylǵan habarlamada.
Mınıstrlik medısınalyq tekseristen ótý barsynda eger azamat áskerge jaramsyz dep tanylsa, onda sol kúni jınaý pýnktinen úıine qaıtarlatynyn, al qosymsha tekserýdi qajet etse, onda medısınalyq mekemelerge jiberiletinin atap ótti.
«Sonymen qatar shaqyrý boıynsha medısınalyq komıssııa men áskerı qyzmetten jaltarý ákimshilik jáne qylmystyq jaýapkershilik retinde qaralatynyn esterińizge salamyz. Shaqyrý qaǵazy boıynsha medısınalyq tekserýge kelmegen jaǵdaıda 5 AEK mólsherinde aıyppul salynady. Áskerı qyzmetten jaltarý 1 myń AEK mólsherinde aıyppul salýǵa, ne sol mólsherde túzetý jumystaryna, ne 400 saǵatqa deıingi qoǵamdyq jumystarǵa tartýǵa, ne bir jylǵa deıingi merzimge bas bostandyǵyn shekteýge nemese odan aıyrýǵa ákep soǵady», deıdi Qorǵanys mınıstrligindegiler.
Aıta ketsek, qazirgi ýaqytta elimizde 1 AEK mólsheri 3063 teńgege teń. Osylaısha, áskerı qyzmetten jaltarǵandarǵa 3 mln 63 myń teńge aıyppul salynýy múmkin.