Semserlesý sportynan Fransııada máresine jetken kezekti Álem kýbogy jarysynda Qazaqstan ulttyq quramasynyń ókili Rýslan Qurbanov otandyq semserlesý tarıhynda alǵash ret kúmis medal jeńip aldy.
Byltyrǵy Tokıo Olımpıadasyna qatysýshy R.Qurbanov – buǵan deıingi iri jarystarda el qorjynyna júlde salyp, úzdikter qatarynan kórinip júrgen tájirıbeli sportshynyń biri. Ol buǵan deıingi Álem kýbogy dodasynda eki márte qola medal jeńip alǵan bolsa, endi, mine, óz nátıjesimen Qazaqstan quramasynyń jetistigin jańartyp, kúmis júldege qol jetkizip otyr.
Otandasymyz Parıjdegi básekesiniń shırek fınalynda mysyrlyq Mohammad Elsaedti jeńse, jartylaı fınalda jarys qojaıyny Aleksandr Bardeneden basym tústi. Al fınalda taǵy bir fransııalyq sportshy Lopez Porte Nelsonmen sheberlik baıqasyp, tartysty ótken kezdesýde ese jiberdi.