Bıyl Semeıde 4 967 páterlik 449,3 myń sharshy metr turǵyn úı salý josparlanýda. Olardyń jalpy quny 57,8 mlrd teńgeni quraıdy. Bul týraly qalalyq qurylys bóliminiń basshysy Suńǵat Amanbekov málim etti, dep habarlaıdy Egemen.kz.
Bólim basshysynyń aıtýynsha, 75 kóppáterli úı, 38 nesıe, eki satyp alý quqyǵynsyz jalǵa berý jáne 35 kommersııalyq úı salynady. Jeke ınvestorlar men turǵyndar esebinen jeke turǵyn úı qurylysy josparlanǵan. Qurylys basqarmasy Qaraǵaıly shaǵyn aýdanyna 1200 oryndyq jáne Vodnyı kentine 600 oryndyq mektep salýdyń eki jobasyn ázirleıdi.
«Sondaı-aq memlekettik-jekeshelik áriptestik jelisi boıynsha balabaqshalar qurylysyna úsh joba ázirlenýde. Qaraǵaıly qalasynda 320 oryndyq balabaqsha salý josparlanǵan. Investory «Sát Trans» JShS.
Voshod kentinde 140 oryndyq balabaqsha salý josparda bar. Investor - «Fırma Azııa» JShS. Jobanyń aldyn ala quny 800 mln teńge. Sonymen qatar Bobrovka aýylynda 320 oryndyq balabaqsha salynady. Investor-JK «Salqynbaeva A.M.». Jobanyń aldyn ala quny 1 270 mln teńge», dedi Suńǵat Amanbekov.
Aıana Toǵanbek