Qaraǵandynyń irgesindegi Saran qalasynyń Arqa tósindegi ındýstrııalyq aımaqqa aınalatyn syńaıy bar. Mysaly, shaǵyn shaharda osy jyldyń sońyna taman úsh jańa zaýyt paıdalanýǵa berilmek.
Taıaýda Qaraǵandy oblysynyń ákimi Jeńis Qasymbek pen «Báıterek» Ulttyq basqarýshy holdınginiń basqarma tóraǵasy Qanat Sharlapaev Saran qalasynda bolyp, osyndaǵy ındýstrııalyq jobanyń biri – shına shyǵaratyn zaýyt qurylysynyń jaı-japsarymen tanysty. Aıta ketý kerek, bul kásiporynnyń bolashaqta Ortalyq Azııadaǵy eń iri zaýyttardyń birine aınalý múmkindigi bar. Jaýapty mamandardyń aıtýynsha, birinshi kezeńde onyń qýattylyǵy jyl saıyn 3,5 mln shına shyǵarýǵa jetedi. Odan keıingi ýaqytta kásiporyn jylyna 9 mln kópbeıindi shına jasap, óndiris kólemin ulǵaıtady.
Qurylysy 2021 jyly bastalǵan zaýyttyń joba jetekshisi Artıom Krymov jumystyń kestege saı júrip jatqanyn atap ótti. Tipti, keıbir jaǵdaılarda jospardaǵydan ozyp ketýshilik te bar eken.
– Bıyl barlyq ǵımarat pen qurylysty júzege asyrýǵa kiristik. Qazir qural-jabdyqtarǵa arnalǵan irgetastar 70%-ǵa daıyn, – dep baıandady ol.
«KamaTyresKZ» JShS – «Allıýr» kompanııalar toby» AQ jáne «Tatneft» JAQ birlesken kásiporny salyp jatqan shına zaýyty osy jyldyń sońyna qaraı ashylady. Munda myńnan astam adam eńbek etetin bolady. Qazirdiń ózinde zaýyt qyzmetkerleri Reseıdegi «Tatneft» kompanııasynyń shına shyǵaratyn kásipornynda taǵylymdamadan ótip jatyr.
«Báıterek» Ulttyq basqarýshy holdınginiń basqarma tóraǵasy Qanat Sharlapaev shına óndirý zaýyty atalǵan holdıngtiń qurylymyna enetin Qazaqstannyń damý bankiniń enshiles uıymy – О́nerkásipti damytý qory qarjylandyratyn iri joba ekenin aıtty.
– Atalǵan joba jumys oryndaryn qurýǵa jáne elimizdiń ónerkásiptik áleýetin damytýǵa baǵyttalǵan, – dep atap ótti Q.Sharlapaev.
Saranda shına zaýytynan basqa myryshtaý jelisi bar metall buıymdaryn shyǵaratyn kásiporynnyń da qurylysy qarqyndy júrip jatyr. Munda jaryqtandyrý tirekteri men dińgekteri, tosqaýyl jol qorshaýlary óndiriledi. Qazirgi ýaqytta óndiriste joǵary jáne dáldigi joǵary tehnologııalardy paıdalanatyn zamanaýı jabdyqtar satyp alynǵan. Josparda kóp adamdy jumysqa ornalastyrý da bar.
Qalada qurylysyn KazIsolation kompanııasy bastaǵan taǵy bir kásiporyn – qospalanǵan bolattan ónim óndirý boıynsha quıý seh ta bolashaǵy zor ındýstrııalyq jobanyń biri. Paıdalanýǵa berilgen kezde bul sehtyń qýattylyǵy jylyna eki myń tonna ónim shyǵarýǵa jetedi. Mamandardyń aıtýynsha, kásiporyn ónimderine degen jergilikti naryqta da, elimiz boıynsha da zor suranys bolady degen boljam bar.
«Báıterek» UBH basqarma tóraǵasy Yutong markaly avtobýs pen arnaıy kólik quraldaryn shyǵaratyn QazTehna zaýytynyń tynys-tirshiligimen de tanysty. Bul kásiporyn óziniń tolyq qýatyna jetkeninde, ondaǵy jumysshylardyń sany 1 myńnyń shamasynda bolady degen boljam bar.
Qazir zaýyttaǵy 400 mamannan turatyn ujym eki jyldyń ishinde óndiristi jolǵa qoıyp, tómen edendi qalalyq jáne 10 metrlik avtobýstardyń eki jańa modelin shyǵarýdy ıgergen. Kásiporynnyń bolashaqqa baǵyttalǵan jospary da aýqymdy: kún tártibinde avtoquramdaýyshtar óndirisi úshin sehtardy keńeıtý jáne qalpyna keltirý jumystary tur.
Jalpy, Saran qalasynda bolyp, mundaǵy ındýstrııalyq jobalardyń qalaı júzege asyrylyp jatqanyn óz kózimen kórgen Q.Sharlapaev shaǵyn shahardyń ónerkásiptik áleýetiniń zor ekenin atap ótti. Jáne ol jaǵymdy jaǵdaıattyń turǵyndardyń turaqty jumys pen tabysqa ıe bolýyna jol ashatynyna senim bildirdi.
Qaraǵandy oblysy,
Saran qalasy