Nomınaldy jalpy ishki ónim 91,5 trln teńge kóleminde baǵalanýda, bul maquldanǵan boljamnan 4,5 trln teńgege joǵary, dep habarlaıdy Egemen.kz Ulttyq ekonomıka mınıstrligine silteme jasap.
«2022 jylǵa arnalǵan makroekonomıkalyq kórsetkishter men bıýdjettik parametrler boljamyn naqtylaý engizilip otyr. Makrokórsetkishterdiń boljamy syrtqy ekonomıkalyq jaǵdaıdy, álemdik ekonomıkanyń damýyn baǵalaý, sonymen qatar munaı naryǵyndaǵy úrdisterdi eskere otyryp naqtylandy. Máselen, jyl basynan beri el ekonomıkasynyń ósýiniń oń serpini baıqalǵan. Jalpy ishki ónimniń ósý qarqyny qańtar-aqpan aılarynda 3,5%-dy qurady. Jyl basynan beri munaıdyń ortasha baǵasy barreline 98 AQSh dollardy qurady. Bul rette Dúnıejúzilik qarjy uıymdarynyń 2022 jyly munaı baǵasy boıynsha boljamy 74 AQSh dollardan 105 AQSh dollaryna deıin qalyptasýda. Osyǵan baılanysty makrokórsetkishterdi naqtylaý kezinde munaıdyń ortasha jyldyq baǵasy barreline 90 AQSh dollar deńgeıinde aıqyndaldy», dedi Ulttyq ekonomıka mınıstriniń mindetin atqarýshy Tımýr Jaqsylyqov.
Onyń aıtýynsha, S&P Global Ratings agenttigi 2022 jyly álemdik ekonomıkanyń ósý boljamyn 4,2%-dan 3,6%-ǵa deıin tómendetti.
«Joǵaryda aıtylǵandardy eskere otyryp, el ekonomıkasynyń ósý boljamy 3,9%-dan 2,1%-ǵa deıin tómendedi. Bul rette nomınaldy jalpy ishki ónim 91,5 trln teńge kóleminde baǵalanýda, bul maquldanǵan boljamnan 4,5 trln teńgege joǵary. О́ńdeýshi ónerkásiptegi boljamdy kórsetkishter álemde proteksıonızmniń kúsheıýine jáne tarıfterdiń ósýine baılanysty metallýrgııadaǵy óndiriske shekteý qoıý saldarynan 3,5%-dan 2,9%-ǵa deıin tómendetildi», dedi ol.
Aıana Toǵanbek