Jasyratyny joq, shalǵaı jatqan aýyldarǵa ınfraqurylym ıgiligi kesh jetedi. Jańashyldyqty sarǵaıa kútken turǵyndar ózge óńirge qonys aýdaryp, eldi mekender elsiz qalatyny ras. Turǵyndardy turaqtandyrý maqsatynda ilkimdi isterdiń jedel qolǵa alynýy mańyzdy.
Ýspen aýdanyna qarasty Konstantınovka aýyly jurtshylyǵynyń kópten kútken armany oryndaldy. Munda zamanaýı balabaqsha esigin aıqara ashty. Mańdaıshasyna «Aıgólek» degen belgi qoıylypty. Irgetasy jańadan qalanbasa da, «Aýyl – el besigi» baǵdarlamasy sheńberinde kúrdeli jóndeýden ótken balabaqsha burynǵydan ózgerek. Kózdiń jaýyn alady. Endigi jerde munda 75 balany qabyldaýǵa múmkindik bar. Ázirge 57 ul-qyz tárbıelenýde.
«Biz úsh topty, ásirese kishi topty ashqanyna óte qýanyshtymyz. Baldyrǵandar 1,5 jastan bastap qabyldanady. Endi jumysymyzǵa alańdamaı baramyz», dep ata-analar bórkin aspanǵa atty.
Aıtpaqshy, aýyldaǵy orta bilim beretin mektep te jóndelýde. Jylytý júıesi men ǵımarattyń shatyry jańartylmaq. Jaýapty merdiger «GradStroıServıs» JShS jóndeý jumystaryn bıyl maýsym aıynda aıaqtaýǵa ýáde berdi. Bastysy, sapasy kóńil kónshitse bolǵany. Mektepte 161 oqýshy bilim alýda.
Árıne, ınfraqurylym sharalary myqtap qolǵa alynsa, aýyldan halyq kóshý bylaı tursyn, qonys aýdarýshylardyń artatyny sózsiz. Máselen, Konstantınovka aýyldyq okrýgine qarasty Ravnopol aýylyna byltyr 127 adam kóship kelgen. Bıyl alǵashqy toqsanda eldi mekenge 5 otbasy (22 adam) qonys tepken. Bul aýylda kelbeti kelisken mektep, balabaqsha, feldsherlik-akýsherlik pýnkt, ortalyq sý qubyry bar. Byltyr 10 kóshege jóndeý jumystary júrgizilipti. Aldaǵy ýaqytta 24 páterlik úıdi qalpyna keltirý josparlanǵan.