Osydan biraz ýaqyt buryn Qurlyqtyq hokkeı lıgasynda (QHL) óner kórsetetin Nur-Sultannyń «Barys» klýbynyń bapkerleri men oıynshylary, ákimshilik jáne tehnıkalyq personaldyń qyzmetkerleri «Jalaqymyzdy ala almaı júrgenimizge úsh aıǵa jýyqtady» dep dabyl qaqqan edi. Sondaı sıpattaǵy maqalalar baspasóz betterinde de jaryq kórdi. Al ótken aptada atalǵan komandanyń baspasóz qyzmeti «Barlyq qaryzdan tolyqtaı qutyldyq» degen aqparat taratty.
Joǵarydaǵy jańalyqtan qulaǵdar bolǵan jankúıerlerdiń kóńilderi jaı tapqandaı boldy. О́ıtkeni kelesi aıda Fınlıandııada álem chempıonatynyń jalaýy jelbireıdi. Atalǵan jarysta Qazaqstan quramasy da óner kórsetedi. Al bizdiń ulttyq komandamyzdyń denin dál sol «Barystyń» oıynshylary quraıtyny málim. Eger tórtkúl dúnıeniń kil myqtylary bas qosqan baıraqty básekege hokkeıshilerimiz alaı-dúleı kóńilmen attansa, onda olardan ońdy nátıje kútý qıyn.
13-29 mamyr aralyǵynda Sýomı elinde ótetin jarysta jerlesterimiz kóńil kónshiterlik nátıjege qol jetkizedi degen úmit te joq emes. Olaı deýge negiz, elıtalyq dıvızıondaǵy dodaǵa biz buǵan deıin de san márte qatystyq. Jasyratyny joq, bul básekelerde tabysty óner kórsete almadyq. Kúni keshege deıin eń úzdik kórsetkishimiz 12-oryn edi. 2005 jyly Aýstrııada ótken básekede otandastarymyz sol mejeden kórindi. Qalǵan jarystardyń kóbinde kósh sońynda qalyp qoıdyq. Áıteýir, kóńilge bir medet bolar jaıt, keıbir azýly komandalarǵa laıyqty qarsylyq kórsetip, úlken tájirıbe mektebinen óttik.
Al byltyr Latvııada shymyldyǵy túrilgen dúbirli dodada Qazaqstan quramasy óz kórermenderin qýantty. Jarys barysynda Latvııa (3:2) men Fınlıandııadan (2:1) býllıt soǵý barysynda basym tússek, Germanııa (3:2) men Italııany (11:3) negizgi ýaqytta qapy qaldyrdyq. Ásirese asa azýly fınder men nemisterdi jeńýimiz otandyq shaıbaly hokkeıshilerimiz úshin aıryqsha oqıǵa ekenin aıtýǵa tıispiz. Alaıda AQSh (0:3), Kanada (2:4) jáne Norvegııaǵa (1:3) ese jiberdik. Nátıjesinde, jeti kezdesýden keıin 10 upaı jıyp, óz tobymyzda besinshi orynǵa taban tiredik. Qorytyndy esepte shvedtermen birge 9-10 oryndardy ózara bólistik. Árıne, azýy alty qarys amerıkalyqtar men kanadalyqtarǵa álimizdiń jetpeıtini beseneden belgili. Biraq norvegııalyqtardy jeńýge bolatyn edi. Skandınavııalyqtardy san soqtyrǵanymyzda pleı-offqa joldama alyp, úzdik segiz komandanyń sanatyna qosylatyn edik. Biraq Baltyq jaǵalaýyndaǵy jarysta bizdiń jigitterge barmaqtaı ǵana baq jetpedi.
Bıylǵy álem chempıonatynda Qazaqstan A tobynda óner kórsetedi. Helsınkıdegi qarsylastarymyz – Kanada, Germanııa, Shveısarııa, Slovakııa, Danııa, Fransııa jáne Italııa quramalary. Bul toptyń basty favorıti kanadalyqtar ekeni sózsiz. О́zge tabystaryn tizbektemeı-aq Úıeńki japyraqtar eliniń ókilderi Olımpııa oıyndarynda 9 márte top jaryp, álem chempıonatynda 27 ret teńdessiz dep tanylǵanyn aıtsaq ta jetkilikti. О́tken ǵasyrdyń alǵashqy jartysynda Olımpıada (2 ret) jáne álem (4 ret) men Eýropa birinshilikterinde (9 ret) jeńis tuǵyryna kóterilgen Germanııa quramasynyń dańqy dúrkirep turdy. Keıinnen olar qarqynyn biraz báseńdetip alǵan edi. Desek te, ýaqyt oza qaıta namysqa qamshy basyp, bıik belesterdi baǵyndyra bastady. Nemisterdiń 2018 jyly Phenchhan Olımpıadasynda kúmis medaldy oljalaýy – joǵaryda aıtylǵan sózimizdiń aıqyn dáleli.
Shveısarııanyń jaǵdaıy da dál solaı. 1922-1953 jyldar aralyǵynda ótken baıraqty básekelerde olar san márte úzdikter sanatynan kórindi. Atap aıtsaq, eki ret Olımpııa oıyndarynda, 9 ret álem jáne 5 ret qurlyq birinshilikterinde túrli-tústi medaldardy ıelendi. Odan keıin quldyraý kezeńin basynan keshirip, uzaq ýaqyt boıy eńse tikteı almady. Tek osydan 10-15 jyl buryn ǵana shveısarııalyqtar asa iri halyqaralyq jarystarda oń nátıje kórsete bastady. Nátıjesinde, 2013 jáne 2018 jyldary uıymdastyrylǵan álem chempıonattarynda kúmis medaldy qanjyǵalaryna baılady.
Dańqy alysqa jaıylǵan Chehııa hokkeıshileriniń kóleńkesinde qalyp qoımaýdy kózdegen Slovakııa quramasynyń da qol jetkizgen jetistikteri jeterlik. Olar 2002 jylǵy álem chempıondary jáne de dál sol jarysta taǵy úsh ret júldeli oryndardy enshiledi. Bıyl slovaktar Beıjiń Olımpıadasynda úshinshi orynǵa taban tiredi. Mine, A tobyndaǵy alpaýyttar osylar. Al ózge komandalarǵa toqtalatyn bolsaq, olardyń eń úzdik nátıjeleri tómendegideı:
Danııa quramasy: Olımpıada – 7 oryn (2022 jyl, Beıjiń), álem chempıonaty – 8 oryn (2010 jyl, 2016 jyl). Fransııa quramasy: Olımpıada – 5 oryn (1928 jyl, Shveısarııa), álem chempıonaty (1930 jyl, 6 oryn). Italııa quramasy: Olımpıada – 7 oryn (1956 jyl, Kortına-d’Ampesso), álem chempıonaty – 4 oryn (1953 jyl).
V tobynda Fınlıandııa, AQSh, Chehııa, Shvesııa, Latvııa, Norvegııa, Ulybrıtanııa jáne Aýstrııa quramalary kúsh synasady. Olar Tamperede óner kórsetedi. Bul kezeńdegi básekeler 13-24 mamyr aralyǵynda ótedi. Sodan keıin ár topta alǵashqy tórt oryndy ıelengen komandalar pleı-offqa joldama alady. 26 mamyrda shırek fınaldyq saıystardyń kýási bolsaq, araǵa eki kún salyp jartylaı fınaldy tamashalaımyz. Al qola medal úshin tartys pen sheshýshi syn 29 mamyrda ótedi dep belgilenýde.
Qazaqstannyń hokkeıshileri Fınlıandııada jalaýy jelbireıtin jarysqa daıyndyqtaryn Nur-Sultandaǵy «Barys-Arenada» bastaýdy jón kórdi. 3 mamyrda Baltyq jaǵalaýyna attanyp, Latvııanyń Rıga qalasynda oqý-jattyǵý jıynyn jalǵastyrady. Sol jaqta olar atalǵan memlekettiń ulttyq quramasymen eki joldastyq kezdesý ótkizýdi josparlap otyr. Arada bir apta ótken soń jerlesterimiz Sýomı eline sapar shegedi. Al álem chempıonatynda Qazaq eli namysyn kimder qorǵaıtyny aldaǵy kúnderi belgili bolady.