Prezıdent Memlekettik kúzet qyzmetiniń jumysymen tanysty, dep habarlaıdy Egemen.kz Aqordaǵa silteme jasap.
Budan keıin MKQ-nyń 30 jyldyǵyna arnalǵan saltanatty is-sharaǵa qatysyp, sala qyzmetkerlerin quttyqtady.
Memleket basshysy bul qurylymnyń ulttyq qaýipsizdikti qamtamasyz etý júıesinde asa mańyzdy ról atqaratynyn, kúzet qyzmetkerlerine aıryqsha jaýapkershilik júktelgenin atap ótti.
– El basshylyǵynyń qaýipsizdigin qamtamasyz etý, strategııalyq nysandardy, sondaı-aq shetelden kelgen mártebeli meımandardy qorǵaý ońaı jumys emes. Sizder osy mindetti abyroımen atqaryp kelesizder. Bul 30 jyl ishinde qalyptasqan ıgi dástúr, sabaqtastyq ekeni sózsiz. Búginde Kúzet qyzmetiniń áleýeti orasan zor. Jaýyngerlik tehnıkalyq jáne jedel áreket etý múmkindikteri mol. Shyn máninde, Memlekettik kúzet qyzmetin naǵyz patrıottardyń ujymy deýge bolady. Eń jaýapty sátte Otan úshin aıanbaı, adal qyzmet etip kelesizder, – dedi Qasym-Jomart Toqaev.
Qasym-Jomart Toqaev qazirgi shıelenisti geosaıası jaǵdaıda Memlekettik kúzet qyzmetiniń túrli syn-qaterler men qaýipterge der kezinde tótep berý múmkindiginiń asa mańyzdy ekenine toqtaldy.
– Jeke quramnyń bilimi men biliktiligin odan ári damytyp, memlekettik kúzettiń búkil júıesin jetildirý qajet. Memlekettik kúzet qyzmeti – erekshe qurylym. Sondyqtan oǵan qoıylatyn talap ta árqashan joǵary bolmaq. Sizder júktelgen mindetti shuǵyl ári tıimdi atqarady dep senemin. Minsiz qyzmetterińiz úshin barshańyzǵa shynaıy rızashylyǵymdy bildiremin, – dedi Qazaqstan Prezıdenti.
Memleket basshysy sala qyzmetkerleriniń eńbegine tabys tilep, birqataryn memlekettik nagradalarmen marapattady. Atap aıtqanda I jáne II dárejeli «Aıbyn» ordenderi, «Jaýyngerlik erligi úshin» medaldary tabystalyp, Prezıdenttiń Alǵysy jarııalandy.
Qasym-Jomart Toqaev marapattaý rásiminen keıin merekelik konsertti tamashalady.